Iluliarmiut seqinniarput
Naak Ilulissani ullumi marlunngornermi qulisimanissaa DMI-mit ilimasaarutigineqaraluartoq, qaammatit aappaata qeqqa kaperlareersorlu ullumi seqinniartoqarpoq, seqinerlu nuisimasoq Iluliarmiu KNR-imut oqaluttuaraa.
Seqineq Pitoqqiup Qaavanit takuneqarsinnaasimavoq. Seqernup nueqqittalernera kulturikkut illorsuarmi Sermermiuni pisussatut aaqqissuussamik arfininngorpat januaarip ulluisa 17-ianni malunnartinneqassaaq. Kulturikkut illorsuarmi Sermermiuni immikkoortortaqarfimmi aqutsisoq Jonas Fleischer taama oqaluttuarpoq.
Quiasaarisartoq Piitannguaq Alaufesen, nipilersortartut Tuperna Kruse aamma Viila Sandgreen, nipilersortartorlu Jens Ole Nathanielsen aliikkusersuissapput. Marie Mathiassen aqutsisoralugu aliikkusersuisoqassaaq.