ASSIT Iluliarmiut kinamiut oqaasii atorlugit tikilluaqquaat
Kinamiut, islandimiut, danskit kalaallillu angalatitsivii takornariartitsinikkut nittarsaassinermut 'Chinese Arctic Travel Summit'-imut Ilulissani ulluni makkunani ingerlanneqartumut peqataapput.
Hotel Arcticillu kinamiut takornariat amerlinissaat naatsorsuutigalugu akunnittarfiup nittartagaa kinamiutut maanna oqaasertaqartilerpaa.
- Reykjavikip Ilulissallu akornanni toqqaannartumik timmisartuussisarneq ammarneqarmalli kinamiut tikeraartut amerliartuinnarsimapput, ineriartornerlu taanna suliniuteqarfigaarput, Hotel Arcticip pisortaanera Erik Bjerregaard taama oqarpoq.
Aamma atuaruk Barentip Imartaata nalaa takornariaqartitsinikkut siuariartorfiuvoq
Pilersaarutit eqaallisakkat periarfissagissaartut
’Chinese Arctic Travel Summit’ Qaasuitsup Kommuniata, Visit Greenlandip nunatsinnilu takornariartitsisut aamma Air Greenland Air Icelandilu suleqatigiillutik aaqqissugaraat.
Tikeraat Kangerlussuup eqqaani sermersuarmut alakkaatinneqarput, maakkarnaveeqquserlutik Sermermiuniipput Ilulissallu eqqaani aamma takusassarsiortinneqarlutik. Qimussernissaalli taamaatiinnartariaqarsimavoq, qimussiussisussat qaleralinniarnertik iluanaarnarnerutimmassuk, aamma umiatsiamik angalannissaat sila pissutigalugu taamaatiinnarneqartariaqarsimavoq. Taamaakkaluartoq Visit Greenlandimi pilersaarutitik naammagisimaarpaat.
- Takornarialerisut tamarmik nalunngilaat pilersaarutit tamatigut malinneqarsinnaasanngitsut, inuussutissarsiuummili suliaqartuusut aaqqiissutissarsiullaqqissuupput periarfissanillu aamma puigunaalluinnartunik neqerooruteqarsinnaasarlutik, taamaammat ataatsimut isigalugu, Kangianit tikeraartuvut naammagisimaarinnillutillu nuannaarput, Malik Milfeldt Visit Greenlandimeersoq taama oqarpoq.
Aamma atuaruk Kinamiut takornariat qimussiussisussaqanngillat
Kinamiut amerliartuinnartut Nunatsinnut tikeraartarput, taamaammat takornariartitsinermik nittarsaassineq manna Visit Greenlandip aaqqissuuppaa, najukkami takornariartitsisartut anginerit sunik neqeroorutissaqarnerlutik takutitsinissaannut periarfissikkumallugit.
- Aammattaaq kinamiut suliniut Newport pillugu saqqummiivigineqarput, tassalu mittarfiup tallilerneqarnissaanut tunngasoq, tamannami tamatta isumalluarfigaarput, Malik Milfeldt aamma oqarpoq.
Kinamiut tikeraat saqqummiineq nuannarilluarpasippaat, kalaallillu nerisassaataat aamma mamarsaatigilluarpaat unnugulu Great Greenlandip, Nuuk Couturep Isaksen Designillu atisaliaannik aamma takutitsiffigineqassapput.
