Iluliarmioq: Ilaqartinnanga anineq saperpunga
Inuup timaata ilaanik maannamut marlunnik Ilulissani ikuallaavimmi nassaartoqarpoq. Tamanna illoqarfimmiunut toqqissisimanngissutaavoq.
Arnaq 64-inik ukiulik unnulersukkut aninissaminut annilaangasalerpoq.
- Annilaanganeq, ernumaneq qamuuna uummatikkut pigilerpara, ilaqartinnanga anineq saperpunga, Rasmine Geisler oqarpoq.
Ukioqqortusilertorli kisimi taamak misiginngilaq. 15-inimmi ukiullip unnukkut kisimiillutik aneertunik malinneqarsimasunik tusaamavoq. Taamaammat aninissani nakerivallaanngilaa.
- Aneertarluni nuanninngilaq. Nakernarunnaarpoq toqqissisimanarunnaarlunilu. Taavalu eqqarsarnarluni uanga kammalaatikka taamaattuuppat? (Ajortuliortuunersut aaqq.) Ilaquttakka taamaappat? Assorujuk eqqarsanarluni, toqqissimanarunnaarluni nassuiaruminaapporluunniit sakkortugaarmat, Aannguaq Wæver oqarpoq.
Kalaallit Nunaanni Politiit suliamut tunngatillugu suli pasisaqannginnamik tigusarinnissimanatik nalunaarput.
Tamanna inuusuttunik unnukkut aneertartunut qitornalimmut unnukkut isumaalulersitsisarpoq.
- Inuk taanna ajortuliornikoq maani illoqarfimmi takussaappat pisuttarlunilu sumiissimasinnaaneranilluunniit, qanoq eqqarsartarsimanerpa, naluara. Soorunami toqqissisimananngilaq innutaaqataalluni tamaani.
- Maani illoqarfimmioqatikka inuusuttuunerusut unnukkut aneertillutik kisimiinnaveersaarnissaannik kaammattuinnarsinnaavakka, imaassinnaavoq ajortulioqqittoq, Aqqalu Huch oqarpoq.
Politiit timip ilaanik ataasinngornermi ualisoq nassaaqqipput. Naapitattalu ukioqqortunersaata timip tamakkerlugu nassaarineqarnissaa kissaatigisorujuussuua.
- Neriuutilerujuuvunga. Ilaanarpunga. Nassaannguata ilanngui tamaasa nassaarineqarnissaat assorujuk neriuutigigaluarpakka. Misiginneqatigigatsigit ilaqutanngui kikkunnguunerput, aamma toqqissisimannginnamik, Rasmine Geisler oqarpoq.
Ikuallaavimmi sulisut timip ilaanik eqqakkat ikuallatassat akornaniittumik arfininngormat nassaaqqaarput. Ataasinngormallu ualisoq nassaartoqaqqippoq. Politiit timip ilai nassaarineqartut sorliunersut ileqqorissaarneq pissutigalugu oqaatigisinnaanagit oqarput.
