Illuut A/S siulersuisortaarlunilu pisortartaartoq

Illuutinut ingerlatseqatigiiffik Illuut A/S nutaarluinnarnik siulersuisoqalerpoq. Jukku Mølgaard siulittaasunngorpoq, Birthe Flæng Møller siulittaasup tullinngorluni kiisalu Inge Bisgaard siulersuisuni ilaasortanngorluni.

- Piginnittut ingerlatseqatigiiffiup aqunneqarnerata pikkorissunik siulersuisoqarluni pisortaatitaqarlunilu nukittorsarneqarnissaa kissaatigivaat, siulersuisuni siulittaasunngortoq Jukku Mølgaard tusagassiutinut nalunaarummi allappoq. 

Siulersuisunngortut aalajangersimapput pisortamik atorfinitsitsinissap tungaanut Søren Lennert Mortensen ataqqiisaagallartumik pisortatut atorfinitsinneqassasoq.

- Uagut siulersuisuni ineqarnermut suliassaqarfimmi suliniutissanik nutaanik iluarsaaqqinnernillu pilersaarusiornermi piviusunngortitsinermilu peqataasinnaanissatsinnut qilanaarpugut, siulersuisunut siulittaasoq paasissutissiivoq, itisilernaguli suut aqqissuusseqqinnermi suliniutigineqassanersut. 

Ingerlatseqatigiiffik illuutinik 1,3 mia. koruunerluinnangajannik nalilinnik piginnittuuvoq. Inissianik nutaanik pisoqaanerusunillu 1100 missaannik inissiaateqarluni kiisalu Namminersorlutik Oqartussat allaffeqarfiat napasuliamiittoq sananeqaqqammersoq piginnittuuffigalugu. 

2015-imut naatsorsuutini ingerlatsinermi angusat 16.8 mio. koruuniusut aammalu nammineq aningaasaatit 124.4 mio. koruuniusut, takuneqarsinnaavoq.

Aamma atuaruk Illuut A/S-ip allamit aqunneqalernerata tunuliaqutaa