Illuatungiliuttut tamarmiusut Naalakkersuisunut tatiginninnginnermik taasititsiniartut

Naalakkersuisuni pissutsit nutaatut saqqummiunniarneqaraluartut nutaartaqanngillat.

Aqqalu Jerimiassen (Atassut) Inatsisartuni ammaanersiorluni oqallinnermi ulloqeqqanngitsiartoq taama oqarpoq.

- Pissutsit naammaginngilluinnarpagut, taanna oqalugiartarfimmit oqarpoq.

Taamaammat Naalakkersuisunut tatiginninnginnermik taasititsinissaq siunnersuutigaa.

Partiit arlallit akuersisinnaanngitsut

Partiit illuatungiliuttut marluk allat, Demokraatit Nalerarlu, Naalakkersuisut katitigaanerannut nutaamut akuersisinnaanngitsut, Aqqalu Jerimiassenip oqalugiarnera sioqqullugu paasinarsivoq. Naalakkersuisunut ilaasortat allanngorarpallaarneri tamatumunnga pissutaasoq, partiinit marlunnit oqaatigineqarpoq.

- Avataaninngaanniit isigalugu naalakkersuisoqarfiit naalakkersuisoqatigiinnut pinnguartarfittut isigineqanngitsoorsinnaanngillat, Jens Frederik Nielsen (Demokraatit) oqalugiartarfimmit oqarpoq.

Tassalu illuatungiliuttut tamarmiusut tatiginninnginnermik taasititsiniartuupput.

Taasititsiniarnerli tupaallannanngitsumik pinngitsoortinneqarpoq. Partiit illuatungiliuttut ilaasortaat arfineq-pingasuupput, naalakkersuisoqatigiinnilu partiinut ilaasortat 21-ullutik.

Taamaalillutik naalakkersuisoqatigiinngortut Inatsisartuni amerlanerussutilinnit – imminnut taanermikkut - akuerisaapput

Naalakkersuisunngortussanngortut ukuusut

Inatsisartunut 2021-mi qinersineqarmt partii IA ajugaammalli naalakkersuisunut siulittaasunngortup naalakkersuisoqatissani ullaap tungaagut nal. 9.30 tooralu ilisaritippai.

Erik Jensen Siumumeersoq peqatigalugu saqqummiivoq. Erik Jensen maannamut ineqarnermut attaveqaasersuutinullu naalakkersusuusoq naalakkersuisuuffimmut allammut nuuppoq, tassa aningaasaqarnermut akileraarutinullu naalakkersuisunngorami. 

Naalakkersuisut nikinnerat naalakkersuisut marluk tallimanngormat tunuarnerisa kingorna pipput.

Mimi Karlsen (IA), peqqissutsimut naalakkersuisutut tunuarluni inatsisartunut siulittaasunngorpoq.

Karl Tobiassen, aalisarnermut piniarnermullu naalakkersuisoq tunuarpoq, aalisakkanut inatsisissap naammassisinnaasimannginnera pissutigalugu.

Naalakkersunngortut ukuupput:

• Muté B. Egede (IA) Naalakkersuisut siulittaasuattut ingerlaannassaaq
   
• Erik Jensen (Siumut) Aningaasaqarnermut Akileraartarnermullu Naalakkersuisoq
   
• Naaja Nathanielsen (IA) Inuutissarsiornermut, Niuernermut, Aatsitassanut, Inatsisit Atuutsinneqarnerannut Naligiisitaanermullu Naalakkersuisoq
   
• Vivian Motzfeldt (Siumut) Naalagaaffinngornissamut Nunanullu allanut Naalakkersuisoq
   
• Aqqaluaq B. Egede (IA) Meeqqanut, Inuusuttunut, Ilinniartitaanermut, Kultureqarnermut, Timersornermut Ilageeqarnermullu Naalakkersuisoq
   
• Kim Kielsen (Siumut) Aalisarnermut Piniarnermullu Naalakkersuisoq
   
• Agathe Fontain (IA) Peqqinnissamut Naalakkersuisoq
   
• Kalistat Lund (IA) Nunalerinermut, Imminut Pilersornermut, Nukissiutinut Avatangiisinullu Naalakkersuisoq
   
• Hans Peter Poulsen (Siumut) Ineqarnermut Attaveqaatersuutinullu Naalakkersuisoq
   
• Jess Svane (Siumut) Isumaginninnermut, Ilaqutariinnut, Sulisoqarnermut Nunamullu Namminermut Naalakkersuisoq

Nutartissaaq...