Illuatungiliuttut Brobergip assuarliornera pillugu: Susoqarnera pillugu ilisimasaqartariaqarpugut

- Susoqarnera pillugu ilisimasaqartariaqarpugut. Naalakkersuisut siulittaasuata inuiaqatigiinnut ilisimatitsissutigisariaqarpaa, Demokraatit siulittaasuat, Jens Frederik Nielsen Brobergip assuarliorneranit Naalakkersuisunut kinguneqartitsisoqassanersoq Múte Bourup Egedep oqaaseqannginnera pillugu oqarpoq.

Jens Frederik Nielsen Siumumi siulittaasumit Erik Jensenimit taperserneqarpoq.

- Qularutiginngilara kigaatsumik suliarineqartoq pillugu tamatta utaqqisugut.

Ukiakkut ataatsimiinneq aqagu aallartissaaq – Múte B. Egedelli Inatsisartuni ammaanersiornermi oqaaseqartinnani oqaaseqarnissaa pingaartumik Erik Jensenip ilimanngilaa.

- Ilimagineruara aqagu aatsaat, immaqa oqalugiaammi aatsaat tamakku oqaatigineqassasut - naluara, kisianni inuiaqatigiit toqqissisimaneq pisariaqartippaat tamannalu maqaasivarput, Erik Jensen KNR-imut oqarpoq.

Naggueqatigiit inuit kisimik taasisinnaassasut

Oqallinneq Brobergip nunatsinni namminiilivissinnaanermut tunngatillugu innuttaasunut taasititsinermi kikkut taasitinneqarsinnaassanersut oqallisigerusullugit aviisimut Berlingskemut sapaatiummat oqaaseqarnerani aallartippoq. Inuillu naggueqatigiinnut inunnut attuumassuteqartut kisimik taasisinnaassasut, Pele Brobergip Berlingskemut oqaatigaa.

AAMMA ATUARUK Naliliineq: Brobergip pititsinerani ima pisoqarsinnaavoq

- Thailandimiut, Danmarkimeersut, tuluit, Frankrigimeersut, Spaniamiut, allalluunniit nunatsinni najugallit nunatta namminiilivinnissaanut taasititsinermi peqataanissamut pisinnaatitaaffeqanngitsut ersarippoq. Tassa naggueqatigiit inuit. Nuussimasutut qanoq misigisimaneq isumaqarnerlu taasinissap oqallisigineqarnissaani matumani pingaaruteqanngillat, Pele Broberg oqarpoq.

Sooruna tamanna eqqartorneqartariaqartoq? Sooruna Kalaallit Nunaanni najugaqartut tamarmik taasisitsinermi peqataatinneqarsinnaanngitsut?

- Nunatsinnimmi nunasiaateqarsimasut nunatsinniiginnarusunnerlutik taasisussaanngillat, Broberg Berlingskemut akivoq.

Ikualanerlu tassani ikummarpoq. Múte B. Egedep Pele Broberg siullermeerluni sapaatiummat unnukkut naqqippaa, allakkatigullu oqaaseqaateqarnerminik sakkortuumik akerlilerlugu: Pele Brobergip oqaaserisai Naalakkersuisut politikkerinngilluinnaraat, Naalakkersuisut siulittaasuat oqarpoq.

Nassuiaateqartoqartariaqartoq

Tamatuma kingorna suliaq Pele Brobergimut kinguneqartitsissutaassanersoq akissutersiniarnera iluatsinneqanngilaq.

Naalakkersuisuuginnassava? Nunanut allanut tunngasunut naalakkersuisoqarfik naalakkersuisumut allamut tunniunneqassava? Partiip ikorfartortaasup Atassutip kissaateqarneratulli Naalakkersuisunit tunuartinneqassava? Naleraq piumasartik pinngikkunikkut siusinnerusukkut siorasaaruteqarnermisut naalakkersuisooqatigiinniikkunnaassava? Imaluunniit susoqassava? 

AAMMA ATUARUK Berlingske: Pele Broberg kukkusumik issuanngilarput

Tamakku Inuit Ataqatigiit siulittaasuanit akissuteqarfigineqanngillat – tamannalu Jens Frederik Nielsenip mamianartippaa.

- Naalakkersuisut iluanni isertuanngitsumik isumaqatigiinngitsoqarpoq. Tamanna iliuuseqarfigineqanngilaq, isumaqarpunga Naalakkersuisut siulittaasuat inuiaqatigiinnut nassuiaateqartariaqartoq, taanna oqarpoq.

KNR-ip Naalakkersuisut siulittaasuat, Múte B. Egede apersorniarsaraa, tamannali suli periarfissaanani.

Taassuma allaffiata "arlaannik" kingusinnerusukkut nalunaaruteqartoqarumaartoq paasissutissiissutigaa, piffissarli taanna suli ilisimaneqanngilaq.

Suliaq naatsumik:

• Aviisip Berlingskep nunanut allanut naalakkersuisoq Pele Broberg apersorsimallugu sapaammi saqqummiuppaa.
• Taanna apersorneqarneqarnermini oqarpoq eqqartortikkusullugu Kalaallit Nunaata siunissami namminiilivinnissaanut taasisitsinermi kikkut taasisinnaatitaasariaqassanersut. Kalaallinit kingoqqisut kisimi taasisitsinermi peqataasinnaasariaqartut, Pele Broberg oqarpoq.
• Taamali oqaaseqarnera Múte B. Egedep (IA), naalakkersuisunut siulittaasuusup, sakkortuumik akerlilerlugu ullup ingerlanerani naqqiuteqarfigaa. Aatsaallu siullerpaamik Pele Brobergimut akerliliivoq.
• Atassutip Pele Broberg naalakkersuisunit tunuartinniarlugu naalakkersuisuni nikittoqartariaqarneranik ataasinngornermi piumasaqarpoq.
• Demokraatillu taasisinnaatitaanermut oqaatigineqartut 'ajorluinnartutut' taavaat.
• Pele Brobergilu Facebookimi takkajaarsuarmik ataasinngornermi unnukkut allaaserisaqarpoq. Tassani allassimasoq Berlingskep allaaserisamini 'isummanik' allanngortitsimasoq. Pele Brobergillu nammineq aamma 'inuiaat namminiilivinnissamut taasitinneqarnissaanni Inuit kisimik taaseqataasinnaasariaqarnerarlugit' issuarneqarsimani eqqunnginnerarpaa.
• Berlingske allaaserisamini isummanik allanngortitsisimanani KNR-imut ataasinngornermi ilisimatitsivoq.