Illuatungiliuttut: Avaleraasartuut isumalluutigivallaarnagit
Nunatta karsiata amigartooruteqareersup, ukioq manna misileraalluni avaleraasartoorniarnerup ajalusoornerata kinguneranik amigartoorutit 50 millioner koruuninik suli ilaqqittussanngorneri, illuatungiliuttunit isornartorsiorneqarput.
- Inuit Ataqatigiinnit mianersoqqussuteqartarnikuuvugut, oqarluata misileraalluni avaleraasartoorniarnermik akitsuutitigut isertitassat nalorninartuaannarmata tamanna mianersuunneqartariaqaraluartoq, Inuit Ataqatigiit siulittaasuat, Sara Olsvig oqarpoq.
Aningaasanullu Inatsisit ukiuni tulliuttuni arlalinni suliarineqartussat eqqarsaatigalugit, misileraalluni avaleraasartoorniarnermit isertitaasinnaasut naatsorsuutigineqartannginnissaat, siunnersuutigalugu.
Aamma atuaruk Avaleraasartoorniarnermit isertitassaagaluit amigaataalerput
- Misileraalluni aalisarnermit siunertaq pingaarnerpaaq tassaasussanngilaq Aningaasanut Inatsimmi putut arlaannik matussusiinissaq, imaluunniit millionit amerlasuut isertinnissaannik siunertaqarneq. Misileraalluni aalisarnermi siunertaq tassaasussaavoq, tonserpassuarnik aalisarsimanissaq tamannalu atorneqassaaq, nunat tamalaat akornanni isumaqatigiinniarnermi ajunngitsumik angusaqarsinnaanermik takussusiisussatut, Sara Olsvig oqarpoq.
Aamma misileraalluni avaleraasartoorniarnerup pilersitaanik aningaasatigut ajornartorsiuteqalerneq, Partii Naleqqamit isornartorsiorneqarpoq.
Aamma atuaruk Avaleraasartuut ukiormanna ikinnerunerinut nassuiaatissaq aana
- Avaleraasartoorniarnerup ukioq manna taama kingusitsigisumik aallartinnera eqqarsaatigalugu tupinnanngilaq tamanna taama ajortigisumik kinguneqassappat, Partii Naleqqap aningaasanut tunngasutigut oqaaseqartartua, Anthon Frederiksen taama oqarpoq eqqaamaqqullugulu Nunatsinni aalisakkat pioreersut aningaasarsiutigineqarnissaat salliunneqartariaqartoq.
- Aningaasanut Inatsisissaq 2015-imut tunngasoq suliarigatsigu, Partii Naleqqamiit oqarpugut, Nunatta avannaani aalisakkat soorlu qalerallit raajallu annertunerusumik pisassiissuteqarfigineqassasut, tassami takusinnaagatsigu taamaaliornermi Nunatta aningaasaqarneranut tamanna pitsaanerusumik kinguneqartussaammat, Partii Naleqappat aningaasanut tunngasunut oqaaseqartartua, Anthon Frederiksen oqarpoq.
