Avaleraasartoorniarnermit isertitassaagaluit amigaataalerput
Avaleraasartuunik pisassiissutit tamarmik, tassa 85.000 tonsit, pisarineqarnissaat naalakkersuisunit naatsorsuutigineqarsimagaluarpoq, nunattalu karsianut tamanna 90 millionit koruuninik isertitsissutaanissaa naatsorsuutaasimagaluarput.
Nunattali sineriaani avaleraasartoorniarneq ukioq manna ajutoorpoq tamannalu tassa aningaasaqarnitsinnut ajortumik sunniuteqartussanngussalluni.
- Immaqa ajalusoornermik taassallugu pissusissamisoorpallaanngikkaluarpoq, ilimagineqarsimasumiik annikinnerusumik aalisarsimasut taanna erserpoq tassa sila annertunerusumik peqqutigalugu silarlorujussuartaqattaarnera pisarineqartut annikinnerusimapput, aningaasaqarnermut naalakkersuisoq, Andreas Uldum oqarpoq, nangillunilu:
Aamma atuaruk Avaleraasartuunit isertitat ikinneroratarsinnaapput
- Pissutsit piviusut aallaavigalugit suliaqartussaagatta aningaasanik isertitaqarnissatsinnik taggissisussaagatta, uani missingersuutinik nangitsinermik aningaasaqarnermut ataatsimiititaliamut nassiussassatsinni suliarineqaleruttortumi ilisimatitsissutigineqassaaq qanoq annertutigisumik pisaqartoqarsimanersoq qanorlu isertitaqartoqarnissaanik ilimasuttoqarnersoq, taanna massakkuugallartoq oqaaseqarfigisinnaanngilara.
Angingaasanullu inatsisissatut siunnersuummik saqqummiussigami oqaatigisani uteqqippaa:
- Kisianni tamassuma takuteqqiinnarpaa inuussutissarsiorneq ataasiinnaq isumalluutigivallaarutsigu taamatut aningaasanik isertitassaraluanik amigartooriataartarnissarput ernumanartuaannassasoq.
Aamma atuaruk Avaleraasartuut ukiormanna ikinnerunerinut nassuiaatissaq aana
- Taamaammat pingaarnerpaatut isaatitsivipput aalisarneq soorunami nukittorsassavarput aamma pingaarnerpaatut isaatitsivittut inissisimagallassaaq, kisianni inuussutissarsiutit allat aamma ineriartortittariaqarpagut ataasiinnarmiit isertitat isumalluutiginnginniassagatsigit, Andreas Uldum oqarpoq.
Avaleraasartoorniarnerup ajalusoornerata kingunerani avaleraasartuunit akitsuutit 50 millionit koruunit isertitassatut naatsorsuutigisaagaluit annaaneqartussanngorput. Taamaalilluni 2015-imi aningaasanut inatsimmit amigartoorutissatut naatsorsuutit 64,3 millionit koruuniugaluit, 114 millionit koruuninut qaffanneqartussanngorunarpoq. Aningaasaqarnermulli naalakkersuisup neriuutigaa aalisarnermit, avaleraasartorniarnerinnaanngitsumit, isertitat tamakkiisut paasinarsippata kisitsisit ajunnginnerulaassasut.
