Illuatungiliuttut anguniagaat aajuku
Aatsitassarsiortut iluanaarutigisinnaasaasa Nunatta iluaqutiginerunissaat, Inatsisartuni illuatungiliuttunit oqaluuserineqarnissaa pingaarsorineqarpoq - taamatullu imerniartarfiit sivisunerusumik ammasalernissaat apeqquteqaatitut oqaluuserineqarnissaat siunnersuutinut ilaallutik.
Imerniartarfiit neriniartarfiillu imigassanik aalakoornartunik tuniniaasartut sivisunermik ammasalernissaat, Atassutip Inuusuttaasa kissaataat naapertorlugu partiip apeqquteqaatitut tamanna oqaluuserineqarnissaa siunnersuutigaat. Imerniartarfiillu matusarneri nalunaaquttap akunnerini marlunni sivitsorneqarnissaata oqaluuserineqarnissaa, Atassutip siunersuutigalugu.
- Tassani tunngavigitsinneqarpoq, pingaartumik sapaatip akunnerisa naanerini imerniartarfiit matunerisa kingorna angerlarsimaffippassuarni ajortut pisartut aningorniarlugit oqalittoqartariaqarnera.
Atassutip Inatsisartuni ilaasortaatitaasa siulittaasuat, Siverth K. Heilmann oqarpoq.
Aatsitassanut inatsisip allanngortinneqarnissaata oqaluuserineqarnissaa Siumumit pingaartinneqarpoq, siunertarineqarluni ingerlatsivissuit aatsitassarsiornermi iluanaarutaasa Nunatsinnit ilagerneqartarnissaasa annerulersinneqarnissaa. Iluanaarutit 10 procentii Nunatsinnut akitsuutitut nakkartinneqartarnissaat Siumumit siunnersuutigineqartareerpoq. Akitsuutip annertussusissa Siumumit maanngagaaq aalajangerneqarusunngikkallarpoq.
- Procentimik taasinngilagut, 5 procentiusinnaavoq imaluunniit 19 procentiusinnaavoq, pingaarnerpaarli unaaginnarpoq aatsitassarsiortut Nunatsinnit aatsitassanik aallereerlutik annissuinerminni akileraartalernissaat, Siumup politikkikkut siulittaasuata tullia, Karl Lyberth oqarpoq.
Siumullu taama siunnersuuteqarnera Atassummit isumaqatigineqarpoq, taakkuli tamassuma Inatsisartuni oqallisigineqarnissaa kissaatiginerullugu.
Atassutip siunnersuutaannut ilaavoq, Nunatsinni nunaqavissut ingerlatsivinnik aallartitsisinnaaneri sulissutigineqartariaqartoq, Atassummit eqqarsaatigineqarullutik rubininik tunisassiorusuttut.
- Rubininik siunissami tunisassiortoqarsinnaanera taakkulu aningaasarsiutigineqarsinnaaneri Naalakkersuisutigoorlugu Inatsisartutigoorlugulu suliniutigineqartariaqartoq isuma qarpugut.
Atassutip Inatsisartuni ilaasortaatitaasa siulittaasuat, Siverth K. Heilmann oqarpoq.
Aalajangigassatut siunnersuutit pingasut oqallisissiassatullu apeqquteqaatit pingasut Atassummit nassiunneqartut Siumumit siunnersuutit katillugit 27-it nassiunneqarput.
Inatsisartut Siulittaasoqarfiata maanngagaaq oqaatigisinnaannginnerarpaat siunnersuutit qassit tiguneqarsimanersut, oqaatigiinnarluguli siunnersuutigineqartut martsip 13-anni aatsaat akuerineqartussaammata.
Demokraatit Kattusseqatigiit Partiiallu oqaaseqartissinnaasimanngilagut, Inuit Ataqatigiit siunnersuuteqarnertik oqaatigerusunngikkaat.
