Illuatungiliuttut: Aleqap atornerluisimanera Inatsisartut oqaluuserisariaqarpaat

Naalakkersuisut siulittaasuata, Aleqa Hammondip aningaasanik 106.000 koruunit sinnerlugit atornerluisimanera, Nunatta avataaniit isigineqarneranut innarliineruvoq pinngitsoorani kinguneqartinneqartariaqartoq, Inuit Ataqatigiit siulittaasuat Sara Olsvig taama isumaqarpoq.
septembarip 29-at 2014 10:15

Tamannalu pillugu Inatsisartut oktobarip 30-anni ataatsimiilerpata, tamanna siullertut oqaluuserisassanngortinneqarnissaa, Inuit Ataqatigiit siulittaasuata, Sara Olsvigip partiillu illuatungiliuttut allat piumasarilersaarpaat.

AAMMA ATUARUK Aleqap Nunatta karsia atornerlukkaa

- Partiit illuatungiuliuttut sisamaasugut, Inatsisartuni ataatsimiinneq aallartippat, immikkut oqaluuserisassatut una pineqartoq ikkuteqqussavarput. Taamaaliulersaarpugut isumaqaratta Inatsisartut kukkunersiuinermut ataatsimiititaliaata Inatsisartunut ilaasortanut immikkut nalunaaruteqarneri soorunami kinguneqartinneqartariaqartoq, Sara Olsvig oqarpoq imalu nangilluni:
 
- Nunatta tusaamaneqarnera aamma tatigineqarnera uani innarlerneqarpoq, Nunattalu aningaasarsiorneranut tamanna kingunerlussinnaalluni. Taamaattumik piaarnerpaamik tamanna pillugu qisuariartariaqarpugut, Inuit Ataqatigiit siulittaasuat, Sara Olsvig taama sakkortutigisumik KNR-imut oqarpoq imalu nangilluni.
 
- Aamma erseqqissumik oqassuunga. Naalakkersuisut kikkuugaluarpataluunniit aningaasanik atornerluisimaneri, Inuit Ataqatigiinniit akuersaarsinnaannginnatigu.

AAMMA ATUARUK Inuit Ataqatigiit: Qinersisoqarli

Sara Olsvig oqarpoq piumasaralugulu, Naalakkersuisut siulittaasuat, Aleqa Hammond atorfimminit tunuartariaqartoq.
 
- Taama pisoqarsimanera isiginngitsuusaarneqarsinnaanngilaq aamma Inatsisartut kukkunersiuinermut ataatsimiititaliaata ersarissumik oqaatigeerpaat, inatsisit unioqqutinneqarsimasut, Inuit Ataqatigiit siulittaasuat, Sara Olsvig KNR-imut arfininngormat taama oqarpoq.

AAMMA ATUARUK Naalakkersuisooqatigiinni eqqissisaaneq