Illuatungeriit piumasaqaatitik attakkaat

Lars-Emil Johansenip aamma Lars Møller-Sørensenip peqquserluuteqarsimasutut unnerluutigineqarneranni eqqartuussivimmi suliami kingulliit ullumi suliarineqarput.

Nalunaaqutaq marlunut eqqartuussuteqartoqarnissaa tamanit maanna utaqqisaalerpoq.

Eqqartuussisulli eqqartuusseqataasullu anillannginneranni illersuisut unnerluussisussaatitaasorlu tunngavilersuuteqaqqaassapput – tassa eqqartuussutip qanoq naammassineqarnissaanik isumaqarnerlutik eqqartuussivimmi oqaatigisussaavaat.

- Unnerluutigineqartut marluk unnerluussummi allassimasutulli eqqartuunneqassasut isumaqarpunga, unnerluussisussaatitaasuuneq, Bo Bjerregaard aallarniivoq.

Taassuma angutit marluk pinerluuteqaqqikkunik aatsaat atuuttussamik ukiumi ataatsimi pineqaatissinneqarsimasunut inissiisarfimmiittussanngortinneqarnissaat 730.000 koruuninillu peqquserluuteqarsimasutut unnerluutiginnissutaasunik taarsiisussanngortinneqarnissaat piumasaraa.

- Lars-Emil Johansenimi kommunimut suliaqarsimanngitsoq nalilerpara.

Unnerluussisussaatitaasullu oqarnera naapertorlugu unnerluutigineqartut marluk naak malikkut allaqatigiittarsimallutik tamarmik nassuiaatigereeraluaraat taama naliliivoq.

- Taamaammat Lars-Emil Johansenip ilumut suliaqarsimaneranut ersarissumik takussutissaqanngitsoq isumaqarpunga.

Aamma naak Lars Møller-Sørensenip suut tamarmik allattuiffimmut allaffimminiissimasumut nalunaarsortarsimallugit oqaatigereeraluaraa.

Nalunaarsuiffik pingaarutilittut qitiulersoq

Nalunaarsuiffillu illuatungeriit pingasut tunngavilersuuteqarneranni pingaarutilittut qitiulerpoq.

Lars Møller-Sørensenip inissisimaffigisaaniileraluarussi qanoq iliussagaluarpisi, unnerluussisussaatitaasoq saqqummiinermini eqqarsaatissiisumik apeqquteqarpoq, nammineerlunilu apeqqut kingorna akissuteqarfigalugu:

- Uanga nalunaarsuiffiit politiinut nassiussimassagaluarpakka. Kisianni takkuttoqanngilaq, ilisimannittutullu nassuiaateqartut Lars-Emil Johansen kommunimut siunnersortitut sulisimasoq ilisimanngilaat, taanna oqarpoq.

- Nalunaarsuiffiilli taakku pissarsiarisimasuugaluarutsigit maaniinnavianngikkaluarpugut, Bo Bjerregaard oqarpoq.

Suliarlu eqikkaraanni unnerluussisussaatitaasup isumaqatigiissut tassaasoraa ‘suliassaq allanit ilisimaneqarani isumaqatigiissutaasimasoq’.

Isumaqataanngilluinnartut

Illersuisut marluk tunngavilersuinerminni taama isiginninneq isumaqatiginngilaat.

Lars Møller-Sørensenip illersuisua Peter Giersing siulliulluni oqaaseqarpoq:

- Sullitara napparsimalerpoq, napparsimasutut nalunaarsimavoq, kingornalu atorfimminit soraarluni, taassuma pigisai poortorneqarput, taassumalu paasissutissat taakku iserfigisinnaajunnaarpai.

- Unnerluussisussaatitaasoq isumaqatigilluinnarpara, nalunaarsukkat taakku nassaarineqarsimagaluarpata maaniinnavianngikkaluarpugut, Peter Giersing oqarpoq.

Tamatuma kingorna isumaqatigiissut oqaluuserineqangaatsiartoq Lars Møller-Sørensenip aamma Lars-Emil Johansenip isumaqatigiissutigisimasaat eqqartorpaa.

- Isumaqatigiissutigineqarsimasumi qaammammut akunnerit 20-t periarfissaapput, taamaammat isumaqatigiissut malillugu angusanik tunniussaqartoqartussaanngilaq, illersuisoq erseqqissaavoq.

Uppernarsaatit pitsaanngitsut isigiarsunnerlu

Maluginiakkat taakku Lars-Emil Johansenimut eqqartuussissuserisup, Ulrik Blidorfip – isumaqatigai.

Taassuma ilisimannittutut nassuiaateqartut Lars-Emil Johansen kommunimut suliaqarsimasutut uppernarsaasimasorai. Uppernarsaatillu amigaataasut unnerluussisussaatitaasup oqaatigisai Lars-Emil Johansenip isigiarsunneranik pissuteqarnerarpai.

- Unnerluussisussaatitaasup uppernarsaatissaqannginnera oqaatigeqattaarpaa – tassunga naqqiissuteqassaanga allakkatigut uppernarsaateqanngimmat.

- Sullitara isigiarsuppoq, taamaammat allakkatigut nalunaarusiorsinnaanani, Ulrik Blidorf saqqummiinermini oqarpoq.

- Taamaammallu sullitara pinngitsuutinneqassasoq isumaqarpunga, taanna oqarpoq.

Unnerluutigineqartut oqaaseqartut

Eqqartuussisup suliamik naammassinngiinerani Lars-Emil Johansen aamma Lars Møller-Sørensen naatsumik oqaaseqarnissamut periarfissaqarput.

- Isumaqatigiissusiornissamut piginnaatitaasumut isumaqatigiissusiorsimasoraanga, Lars-Emil Johansen naatsumik oqarpoq.

Lars Møller-Sørensen oqaaseqarnerulaarpoq:

- Nalunaarsuiffiit uannut nassiunneqarsimatinnagit pisuutinneqarnissara eqqarsarnartoqarpoq.

- Nalunaarsuiffiit mailikkullu nassiussarsiarisimasakka kommunip tigummisimassagai ilimagaara. Mailimut isersinnaajunnaarnikuuvunga, kommunili isersinnaavoq, taanna oqarpoq.

Eqqartuussivimmi suliaq qanoq inerneqassanersoq nalunaaqutaq marlunut eqqartuussuteqartoqarpat akissutersineqassaaq.