Illersuisut nukittorsaavigineqalersut

Kalaallit Nunaanni illersuisuunertut atorfinitsinneqartussap tamakku akisussaaffigissavai. Atorfik taanna danskit inatsisinik atuutsitsinermut ministeriata pilersinniarlugu sulissutigaa.

Inuit inatsisinik unioqqutitsisimasutut eqqartuunneqartussat, ilisimasaqqissaartariaqarpaat illersuisussatik ilinniarluarsimasuusut.

Inatsisinik atuutsitsinermut ministereqarfiup nunatsinni taama ittumik atorfinitsitsiniarnerata tamanna siunertaraa.

Kalaallit Nunaanni inatsisilerituut peqatigiiffianni siulittaasup tullia Finn Meinel isumaqarpoq tamanna pisariaqarluinnartoq:

- Imaakkami, illersuisuunertut atorfinitsinneqartussamut siunertaavoq illersuisartut Kalaallit Nunaanni tamarmeersut ilinniarteqqinneqarnissaat siunnersorneqarnissaallu isumagissallugu. Nunatsinni illersuisuunertut atorfeqartoqannginnerata kinguneraa  illersuisuusartut maannamut siunnersorneqartannginnerat.

Pinerluttoqarsimatillugu illersuisuusartut ullumikkut tassaanerusarput inuinnaat politiilluunniit ilinniaqqinnikkut illersuisunngorsimasut. Tamakku maanna illersuisuunertut atorfinittussap pikkorissaaqataaffigisalissavai.

Ullumikkumut naleqqiullugu illersuisuunertut atorfinittussamit suna naatsorsuutigisinnaavarput, aperivugut.

Finn Meinel akivoq:

- Ullumikkumut naleqqiullugu inatsisitigut isumannaannerulerneq kingunerissavaa. Eqqartuussisoqarnerani sulinermut tunngasut 2010-mi suliarineqarmata eqqartuussisuunertut atorfik tassunga ilaavoq. Aatsaalli suliaq taanna maanna aningaasalerneqarpoq.

Inuit Ataqatigiit Folketingimi ilaasortaatitaata Aaja Chemnitz Larsenip tamanna nuannaarutigaa. Suliarmi taanna taassuma ilunersuutigisimasaanut ilaavoq.

- Innuttaasunut inatsisinik unioqqutitsisimasunut, arlaatigut oqimaaqatigiisitsinissaq pisariaqarpoq- taamaalilluni inatsisinik unioqqutitsisimasut inatsisitigut illersugaanissaat aamma qulakkeerneqassaaq. Tassa unnerluussisut illersuisullu sulineranni ullumimut naleqqiullugu oqimaaqatigiinnerulissaaq, Aaja Chemnitz Larsen naggasiivoq.

Danskit inatsisinik atuutsitsinermut ministeriata Søren Pindip nalunaarut illersuisuuneqalernissamut tunngasoq ukiamut saqqummiutissavaa.

Naatsorsuutigineqarpoq atorfimmut 2 millioner koruunit missaanniittut immikkoortinneqarumaarut.