Illersuisoq eqqarsartaatsikkut innarluuteqarneranik atornerluineq pillugu: Eqqartuussut naapertuilluartuliornerunngilaq
Nuummi Eqqartuussisoqarfik Sermersuumi ilaatigut arnamut eqqarsartaatsimigut innarluuteqartumut kinguaassiutitigut atornerluisoqarneranut tunngatillugu suliami ataasinngornermi ualikkut sakkortuumik eqqartuussuteqartoqarpoq.
Qaammatini aqqaneq-marlunni pineqaatissinneqarsimasunut inissiisarfimmiitsitsisoqarnissaa arnamullu atornerlunneqartumut 50.000 koruuninik taarsiissuteqartoqarnissaa unnerluussisussaatitaasut piumasarigaluarpaat.
Eqqartuunneqartorli, Hans-Jørgen Jenseeraq Albrecht Barselaj Rosing, tassunga taarsiullugu ukiumi ataatsimi qaammatinilu qulini pineqaatissinneqarsimasunut inissiisarfimmiittussanngortinneqarlunilu 60.000 koruuninik taarsiissuteqartussanngortinneqarluni eqqartuunneqarpoq.
Tamanna eqqartuunneqartup illersuisuata, Ingo Lyberth Bisgaardip ilorrisimaarutiginngilaa.
Eqqartuussut ullumi nalunaarutigineqartoq ilorrisimaarutigaajuk?
- Naamik, ilorrisimaarutiginngilara. Eqqartuussut pingaartumik pissutsimut siullermut tunngatillugu naapertuilluartuliornerunngissoraara. Isumaqarluinnarpunga illersugara pinngitsuusoq, taanna eqqartuussutip nalunaarutigineqarnerata kingorna KNR-imut oqarpoq.
Eqqartuunneqartoq: Eqqarsartaatsigut qanoq innera ilisimanngilara
Hans-Jørgen Jenseeraq Albrecht Barselaj Rosing pissutinit pingasunit siullermi arnamik tarnikkut napparsimasumik aqqaneq-marluk aqqaneq-pingasullu missaannik ukioqartutut nalilerneqarsimasumik atornerluisimasutut pinngitsuunerarpoq.
Eqqartuussivimmili suliami pissutsit marluk nakuusernermut siorasaarinermullu tunngasut nassuerutigai.
Taakkunani nukaminut 2022-mi nakuusersimasutut siorasaarisimasutullu eqqartuunneqarpoq.
Hans-Jørgen Jenseeraq Albrecht Barselaj Rosingip suliami pissut siulleq eqqarsartaatsimigut napparsimasumik napparsimaneranik atornerluilluni atoqateqarsimanermut tunngasoq suliarineqaqqittussanngortippaa. Taassumami arnap eqqarsartaatsikkut qanoq ittuunera atoqatiginnginnerani ilisimasimanagu erseqqissaatigaa.
Kalaallit Nunaanni Politiit unnerluussisussaatitaasuunerata, Lars Petersenip pinerluuteqarnermik annertussusiliineq ilorrisimaarutigilluinnarlugu KNR-imut nassuiaatigaa. Taassuma oqarnera naapertorlugu pinerluuteqarneq ilungersunarluinnartoq pineqarpoq.
- Pinerlunnerit sanilliunnissaat ajornakusoorpoq. Eqqartuunneqartup iliuuserisimasaatut iliuuseqarneq pinerluuteqarneruvoq ilungersunarluinnartoq. Kisianni toqutsinerit pinerluuteqarnerillu allat sanilliullugit aallartikkaanni tamanna ajornakusoorpoq, taanna KNR-imut oqarpoq, nangillunilu:
- Kisianni immikkoortillugu isigigaanni ilungersunarluinnarpoq, eqqartuussiviup tamanna aamma taama nalilerlugu taama eqqartuussuteqarpoq.
Eqqartuussivimmi suliaq Nunatta Eqqartuussisuuneqarfiani qaqinneqarpat assinganik pineqaatissiisoqarnissaa piumasarissanerlugu unnerluussisussaatitaasut suli naluaat.
Ukioq ataaseq sinnerlugu pineqaatissinneqarsimasunut inissiisarfimmiitsitsisoqarnissaa kiisalu suliap peqqarniinnera pissutigalugit KNR-ip eqqartuunneqartup aqqa ilannguppaa. Tamanna tamanut soqutiginaateqartutut KNR-ip nalilerpaa.
