Angut kinguaassiutitigut atornerluisimasutut pineqaatissinneqarsimasunut inissiisarfimmiittussanngortinneqartoq
Naqqiissut: KNR-ip suliami pissutsit pinngitsaaliinertut nassuiaatigigaluarpai. Eqqartuussulli Pinerluttuliornermi Inatsit §78 eqqarsartaatsimigut innarluuteqartumik kinguaassiuutitigut atoqatiginninnermut tunngavoq. Eqqartuunneqartup arnaq piumanngitsoq atoqatigisimagaa unnerluussissummi allassimavoq. KNR-ip kukkussut utoqqatsissutigaa.
MIANERSOQQUSSUT: Ilanngutassiaq nuanninngissinnaasunik paasissutissartaqarpoq.
31-nik ukiulik, Hans-Jørgen Jenseeraq Albrecht Barselaj Rosing pillugu Nuummi Eqqartuussisoqarfik Sermersuumi ualeq manna eqqartuussut naammassineqarpoq.
Taanna pissutsini pingasuni eqqartuunneqarpoq, matumani eqqarsartaatsimigut arlalinnik innarluuteqartumik 2021-mi kinguaassiutitigut atornerluisimasutut.
Angut ukiumi ataatsimi qaammatinilu qulini pineqaatissinneqarsimasunut inissiisarfimmiittussanngortinneqarpoq, arnamullu 60.000 koruuninik taarsiissuteqartussanngortinneqarluni.
Tamatuma saniatigut nukkaminut 2022-mi nakuusersimasutut sioorasaarisimasutullu eqqartuunneqarpoq.
Hans-Jørgen Jenseereaq Albrecht Barselaj Rosing nasaasartalimmik qaqortumik tujuuloqarpoq, qernertunik timersuutinik qarleqarlunilu kamiit sneakersit atorpai. Angut kalaallisut isikkoqarpoq, mikillunilu nerinnappoq.
Unnerluussisussaatitaasut qaammatini aqqaneq-marlunni pineqaatissinneqarsimasunut inissiisarfimmiittussanngortinneqarnissaa piumasareqqaaraluarpaat. Eqqartuussisiviulli pissutsit sukannersut arlallit tunngavigalugit eqqartuussuteqarpoq, taamaammat angut piffissami sivisunerusumi pineqaatissinneqarsimasunut inissiisarfimmiittussanngortinneqarpoq.
Hans-Jørgen Jenseeraq Albrecht Barselaj Rosingip pissut siulleq kinguaassiutitigut atornerluisimasutut tunngasoq pinngitsuutinneqarnissani siunertaralugu nunatta eqqartuussisuuneqarfianut suliassanngortippai.
Taassuma pissutsit marluk akuerai.
13-inik ukiulittut eqqarsartaaseqartoq
Hans-Jørgen Jenseeraq Albrecht Barselaj Rosingip pinngitsaaliinerarneqaanermi pinngitsuunerarpoq, taassumali atoqatigiissimallutik nassuerutigaa. Taassuma oqarnera naapertorlugu arnap eqqarsartaatsikkut innarluuteqarnera ilisimasimanngilaa.
Arnaq piffissami tassani 28-nik ukioqarpoq, 13-illi missaannik ukioqartutut eqqarsartaaseqarluni.
Unnerluussissut naapertorlugu arnaq skizofreneqarlunilu ineriartornermigut innarluuteqarpoq. Arnaq piffissami pinerluffiusumi anaanamini ataatassaminilu najugaqartuuvoq.
Arnaq ania eqqartuussivimmi ilisimannittut nassuiaateqarpoq. Taassuma arnaq ulloq unnuarlu paaqqutarineqarnissaminik pisariaqartitsissuusoq kisimiissinnaanngitsorlu oqaatigaa.
Illersuussisulli oqarnera naapertorlugu Hans-Jørgen Jenseeraq Albrecht Barselaj Rosingip arnap eqqarsartaatsimigut qanoq innera atoqatiginninnerani ilisimasimanngilaa:
- Taamaattuusoq ilisimasimagaluarukku (atoqatigiikkusunnersoq aaqq.) aperinavianngikkaluarpara, taanna eqqartuussivimmi oqarpoq.
Arnaq politiinit apersorneqarami Hans-Jørgen Jenseeraq Albrecht Barselaj Rosing atoqatigiinnerminni peersinniartarsimagaluarlugu arlaleriarlunilu uneqqusimagaluarlugu nassuiaatigaa.
Hans-Jørgen Jenseeraq Albrecht Barselaj Rosingilli taama paasisimanngilaa:
- Siullermik atoqatigiikkusuppasinngikkaluarpoq. Taava ornereerlugu oqarfigaara. Ajanngilaanga. Malugisinnaavara piumasoq. Timaa qisuarianngilaq. Unilluni nallangaannarpoq, taanna eqqartuussivimmi nassuiaavoq.
Nakuuserneq siornasaarinerillu
31-nik ukiullip pissutsit marluk nukkaminut 2022-mi aggustimi nakuusernermut sioorasaarisimanermullu tunngasut nassuerutigai.
Taassuma nukkani siniffimmut ajassimavai. Uanilu ilaatigut toqqusasseqqallugu.
Matumanilu Hans-Jørgen Jenseeraq Albrecht Barselaj Rosingip nukani toqqusasseqqaatigalugu ikinnerpaamik pingasoriarluni “toqussavakkit”-mik oqarfigisarsimavaa.
