Illersornissaqarfik Issittumi timmisartut alapernaarsuutit nutaat pillugit isumaqatigiissuteqangajalersoq

Danskit illersornissaqarfiata timmisartortitseqatigiiffik Air Greenland, Issittumi nakkutilliinermik suliaqartussaq, attartornissamut isumaqatigiissuteqarfiginialerpaa.

Tamanna danskit illersornissamut ministeriat Jeppe Bruus atorfimmini nutaami siullermeerluni ataasinngorpat Kalaallit Nunaannut tikeraarpat, ilaatigut oqaluuserineqassaaq.

- Isumaqatigiissutip tamatuma qanittukkut naammassinissaa sulissutigissavara. Air Greenlandip suliassat ilai, timmisartunit Challengerinit suliarineqartarsimasut isumagisussanngussavai, Jeppe Bruus Ritzauimut oqarpoq.

- Kalaallit Nunaanni pisut nakkutigiuarnissaat uagutsinnut pingaaruteqarpoq, taamaattumik timmisartumik nakkutilliisumik attartornissaq isumaqatigiinniutigileruttorparput, nalunaarummi allassimavoq.

Sakkutuut timmisartui Challengerit "nutaanngilivallaalivissut“, illersornissamut ministerip nassuiaatigaa. oqarpoq. Taakkua atorunnaarsikkiartuaarneqassapput Air Greenlandillu attartornissamut isumaqatigiissut naapertorlugu, timmisartut Challengerit suliarisartagai isumagilissavai.

Timmisartut alapernaarsuutit Challengerit teknikkikkut iluarsaaqqinneqartarnerat aserfallatsaaliorneqartarnerallu pissutigalugit piffissap ilaani tamakkiisumik atorsinnaaneq ajornerat, siusinnerusukkut allaaserineqareerpoq.

Kalaallit Nunaannut tikeraapallalersoq

Illersornissaqarfiup Kalaallit Nunaat 2024-mi ulluni 278-ini qulaallugu timmisartorput.

Illersornissamut ministereqarfik ukioq manna januaarimi  nalunaarpoq, Air Greenland “nakkutiginninnermik suliassanik tigusinissaat" isumaqatigiissutiginiarneqartoq.

Timmisartut Challengerit atorunnaarsitaajartuaarnissaat, Issittoq pillugu politikkikkut isumaqatigiissummi aalajangerneqarpoq. Tassungalu atatillugu Kalaallit Nunaanni ingerlatsisut suleqatigiinnissaq pillugu isumaqatigiissuteqarfigineqarnissaat oqaatigineqarpoq.

Jeppe Bruusip nunanut allanut naalakkersuisoq, Mute B. Egede (IA), Kalaallit Nunaannut tikeraarnermini ataatsimeeqatigissavaa.

Illersornissamut ministerip Issittumi Sakkutooqarfiup qullersaqarfia aamma kalaallit suliffeqarfii arlallit - ilaatigut Air Greenland, pulaassavai.

- Illersornissamut ministeritut atorfeqalerninni Kalaallit Nunaannut piaartumik tikeraarnissara pingaartissimaqaara, Jeppe Bruus oqarpoq.

Jeppe Bruus juunip pingajuani illersornissamut ministerinngorpoq, taassumalu tikeraapallanniarnera Mute B. Egedep nuannaarutigaa.

- Kalaallit Nunaanni suliffeqarfiit, Illersornissaqarfiup suliassaanik assigiinngitsutigut tapersersuisut, ataatsimeeqatiginissaat immikkut nuannaarutigaara, taanna tusagassiuutinut nalunaarummi oqarpoq.

Illersornissaqarfiup pisortaa Michael Wiggers Hyldgaard ataasinngornermi Kalaallit Nunaannut tikeraarnermi aamma peqataassaaq.

/ritzau/