Illersornissamut ministeri: Kalaallit Nunaanni upalungaarsimaneq amigarpoq

- Suliassaq unammillernartupilussuuvoq, maannakkullu pigisavut atorlugit nammassissallugu ajornakusoortupilussuulluni. Taamaammat qaavatigut aningaasaliinissaq siunertaralugu partiit allat oqaloqatiginiarpakka. Naak piffiit maannakkut ileqqaarniarfiugaluartut, illersornisatta pitsaanerpaanissaa qulakkeertariaqarparput, isumaqarpungalu Kalaallit Nunaat immikkut isiginiarneqartariaqartoq, Nick Hækkerup, DR-ip TV aviisianut ippassaq oqarpoq.

Nick Hækkerup Nunatsinni sapaatit akunneranni kingullermi tikeraarpoq, Folketingillu illersornissaq pillugu ataatsimiititaliami ilaasortat upalungaarsimaneq paasisassarsiorfigalugu Nunatsinni sapaatit akunneri marluk qaangiuppata angalaassapput.

Ministerip siunnersuutaa ataatsimiititaliap siulittaasuata, Venstremeersup Karsten Nonbop, angalannissaq sioqqullugu tusaannarlugu tapersersorusunngilaa.

- Unammilligassaq takusinnaagaluarlugu, Kalaallit Nunaanni upalungaarsimanerup annertusarnissaanik neriorsuerusunngilanga, Karsten Nonbo oqarpoq.

Illersornissaqarfimmi ileqqaarutissanik 2,7 millardit koruunik nalinginut ukiaru nassaarniartoqarnissaa taassuma innersuussutigaa.

Aamma Dansk Folkepartimi eqqarsarnartoqartitsipput.

- Isuma paasilluarsinnaavara, aningaasalli suminngaanniissappat? Suliassammi allat pingaartut akissaarutissagatsigit, Dansk Folkepartip illersornissaq pillugu oqaaseqartartua Marie Krarup oqarpoq.

Kisianni Danmarkip Nunatsinni iliuutsiminik annertusilerinissaanut Konservativit isumaqataalluinnarput.

- Danmark issittumiititsinerusariaqarpoq. Taamaaliornikkut Danmarkip illersornissakkut soqutigisani aalluunnerusinaavai, taamaammallu isumaqarpunga issittumi upalungaarsimaneq nukittorsarneqartariaqartoq, illersornissaq pillugu oqaaseqartartoq Lene Espersen oqarpoq.