Illersornissamut isumaqatigiissutip nutaap Ilisimatusarfik utaqqisumik inissisimalersikkaa

Ilisimatusarfiup Pinngortitaleriffiullu USA-mut isumaqatigiissutip qanorpiaq isumaqarnissaa utaqqimaarpaat. Pinngortitaleriffik tamatuma saniatigut Europamiunik suleqatissanut saappoq.

Allattoq Markus Valentin

oktobarip 02-at 2026 16:12

Ilisimatusarfiup, Pinngortitaleriffiup aamma Narsami misissuiffiup USA-mik nutaamik suleqateqarnissat unitsikkaat, KNR-ip ilanngutassiani arlalinni aasaq allaaseraa.

Tamanna USA-p ilisimatusarnermik politikkimut atassusiineranik kiisalu Kunngeqarfik Danmarkimut kilitsissiatut suliaqartoqarnissaata aarlerigineqarneranik ilaatigut tunngaveqarpoq.

KNR-ip ilisimatusarfiit Illersornissamut isumaqatigiissutip nutaap sapaatip akunnerata siuliani atsiorneqarnerata kingorna attaveqarfigeqqippai.

Aamma atuarukImmikkut ilisimasalik ilisimatusartut akornanni sunniiniartoqarsinnaaneranik mianersoqqusisoq

Taakku suleriaasertik allanngortissimanagu oqaatigaat.

- Pisortatigoortumik pisortatiguunngitsumillu pisut soorunami alaatsinaallugillu paasiniarpagut. Maannakkumut kingullermik oqaloqatigiinnitsinni periuserisimasarput malillugu ingerlaannassaagut, Pinngortitaleriffiup pisortaa, Josephine Nymand oqarpoq.

- Piffissami aggersumi susoqarnissaanut atatillugu utaqqimaalaarpugut. Kisianni maannakkumut iliuuserisimasarput malillugu ingerlavugut, Ilisimatusarfimmi rektori, Mari Kleist oqarpoq.

Isumaqatigiissulli nutaaq USA-mut atassuteqarnermut qanoq sunniuteqarnissaa piffissami aggersumi oqaluuseriniarpaat.

Suliaq naatsumik oqaluttuaralugu

USA-p politikkikkut suliaqartut USA-p ilisimatusarnerani siuttuuffilersulersimagai, KNR-ip aasap ingerlanerani allaaseraa.

Tamanna Pinngortitaleriffiup, Ilisimatusarfiup, Narsami Misissuisarfiup aamma Videnskabernes Selskabip eqqumaffigaat.

USA-p ilisimatusarnermi suleqatigiinnermik kilitsissiatut suliaqarnermut atuisinnaanerata aarlerinarnera pissutigalugu Politiit Immikkut Misissueqqissaartartuisa (PET) saaffiginnissutit tamaasa misissuiffigaat.

Videnskabernes Selskabip oqarnera naapertorlugu ilisimatusarfiit sillimaniarnerat sorsunnersuup nillertup nalaanut sanilliullugu qaffasinneruvoq.

Pinngortitaleriffiup Ilisimatusarfiullu USA-mik nutaamik suleqateqarnissat taamaammat unitsippaat. Taakkuli naleqqutilerpat suleqatigiinnissaq ammaffigaat.

Alaskami ilisimatusartut inuit kulturiat pillugu ilisimatusarnissaat suleqatigiissinnaanermut assersuutigineqarsinnaavoq. Ilisimatusarfimmi rektori oqarpoq.

Allisiguk

Isumaqatigiissut akuersissutigineqassasoq

Ilisimatusarfimmili aqutsisut periutsimik allannguinissamik oqaluuserilinnginneranni illersornissamut isumaqatigiissut Inatsisartuni akuerineqaqqaassaaq.

Rektori, Mari Kleist taama oqarpoq.

- Isumaqatigiissut atortussanngortinneqarluni akuerineqaqqaassaaq. Tamatuma kingorna aqutsisuni oqaluuserissavarput. Kisianni maannakkut utaqqimaarluta pissutsit qanoq ingerlanerannik takunninnissarput killiffigaarput.

Ilisimatusarfiulli aalajangersimariinngitsunut suleqatigiinnissamik soqutiginnereersut itigartitsissutiginngilai, rektori oqarpoq.

Suleqatigisinnaasat naliliiffigineqarnissaat insitutimi pisortap akisussaaffigiuaannarpaa.

- Saaffiginnissutit kikkuunerat qanorlu siunertaqarnerat pillugu ataasiakkaarlugit suliariuaannarpagut.

Europamiunut sammisoq

Pinngortitaleriffiup pisortaa, Josephine Nymand taakku ilagaat.

Taassuma pingaartumik Frankrig, Tuluit Nunaat aamma Schweiz ilisimatusarnermi suleqatigiinnerulernissamik soqutiginnittut aasaq oqaatigaa. Tamatuma saniatigut EU aamma soqutiginneruvoq.

Pinngortitaleriffiup soqutiginnittut taakku maannamut ukkatarigallassavai.

- Maannamut periuserput ingerlatiinnarallassavarput, Josephine Nymand oqarpoq.

- Nunatsinni pinngortitalerinermi ilisimatusarnermut aningaasarpassuarnik immikkoortitsisut ukkataraagut. Taakku maannakkut aamma attaveqarfigilluarpagut. Ilisimatusarnissamut aningaasassarsinissarput soorunami neriuutigaarput.

Sakkutooqarfiit nutaat aamma ilisimatusarneq nutaaq

Illersornissamut isumaqatigiissut nutaaq tunngavigalugu Narsarsuarmi Mestersvigimilu ilisimatusarnissamut nutaanik aamma periarfissaqartoqalersinnaavoq, Josephine Nymand oqarpoq.

Maannali susoqarnissaa arlaannaanilluunniit ilisimaneqanngilaq.

- USA-p siusinnerusukkut Kangerlussuarmiinnerani tapiissuteqarsinnaasarpoq. Ilisimatusarnermi suliniuterpassuit atortorissaarutinik allanillu assartuiffiunissaannut Amerikamiut danskillu illersornissaqarfiinit umiatsiaat piffissap ingerlanerani ikiuuttarsimapput, Josephine Nymand.

- Tamanna siunissami immaqa iluaqutigisinnaavarput. Tamanna naluarput. Maannakkut utaqqimaarpugut.

Paasissutissat allat utaqqigaat

Isumaqatigiissut pillugu allagaatit sakkutooqarfinnik pilersitsineq qanoq ingerlassanersoq itisilerneqanngilaq.

Tamanna naalakkersuisut aamma Amerikamiut aallartitaata akornanni Ataatsimiititaliami Atuuttuartumi ukiumut ataasiartumik ataatsimiittarneranni oqaloqatigiissutigineqassaaq.

Decembarimi kingullermik ataatsimiittoqarpoq.

Aamma atuarukVidenskabernes Selskab USA-p issittumi ilisimatusarnikkut periaasaanut aalassattoq

Mari Kleistip institutinik soorlu Ilisimatusarfimmik peqataatitsinissamut pilersaaruteqartoqarnersoq ilisimaneqalernissaa taamaammat utaqqimaarpaa.

- Immaassinnaasoq ilinniartitaanermut ilisimatusarnermulluunniit suliaqarfiit ilaannik immikkut ittumik suleqatigiinnissamik immikkut kissaateqartoqartoq.

Mari Kleistip Ilisimatusarfik qanorluunniit pisoqaraluarpat arlaannut attuumassuteqanngitsumik institutiusoq ilanngullugu oqaatigaa.

- Uagut sinnerlugu aalajangiinngisaannarput.

Illit isummat pingaartittaqaarput. Nutaarsiassaq pillugu isorisat nersualaarinerillu uani tikilluaqquagut.