Ilisimatuutut allaatigisaq: Issittumi ilimagisamit sukkanerusumik kiatsikkiartorpoq
Issittoq kiatsikkiartuinnarpoq, silalu pillugu immikkut ilisimasallit eqqoriaanerannut naleqqiullugu tamanna sukkanerusumik pilluni.
Kiatsikkiartorneralu ima sukkatigaaq ukiut 10.000-t sinnerlugit matuma siornatigut Sermersuaqarnerata nalaanisulli sukkatigisumik kiatsikkiartorluni.
Immikkut ilisimasallit nunanit tamalaaneersut misissuineranni tamanna takuneqarsinnaavoq. Immikkut ilisimasallit Danmarkimi DMI-eersut pingasut misissuisunut ilaapput.
Martin Stendel, silap pissusianik ilisimatusartoq, taakkununnga ilaavoq. Taassuma oqarnera naapertorlugu kingullermik Sermersuaqarnerani tassanngaannartumik kiatsipiloortarneratut ittumik maanna pisoqarpoq.
AAMMA ATUARUK Sermersuarmi juulimi kiannerpaaffiusoq nillernerpaaffiusorlu qaangerneqartut
- Ukiut inuup inuuffiisa nalaanni arfineq-pingasut qulit angullugit taamanikkut kiatsittoqarnera matumani eqqaasinnaavarput, paasissutissallu maanna takusinnaasatta takutippaat assinganik maanna pisoqartoq.
- Naak taamanikkut pissutaasut maanna pissutaasunut allaanerugaluartut immap sikuata annertussusaanut tamarmik tunngassuteqarput, Martin Stendel oqarpoq.
Uissuumminartumik pisoqarsinnaanera
Silap pissusiata allanngoriartorneranut maanna missingersuutit aamma naammanngitsut misissuinerup aamma takutippaa. Ilami missingersuutit malinnaasinnaanngitsut immikkut ilisimassallit oqaatigaat.
Issittumi siunissami qaninnermi uissuumminartumik pisoqarsinnaanissaa Martin Stendelip mianersoqqussitigaa, tassanngaannartumimmi kiatsingaatsiarsinnaanera aarleqqutigineqarsinnaanerarpaa.
Kingullermik Sermersuaqarnerata nalaani piffissap ilaani kiatsingaatsiartarsimavoq, soorlu 1979-imit 2018-ip tungaanut ukiut qulikkaat ingerlaneranni 1 gradimik kiatsikkiartorsimasoq.
Issittumi silap pissusiata allanngoriartorneranut missingersuutit pitsaanerulersinneqartariaqartut Martin Stendel isumaqarpoq:
AAMMA ATUARUK Naalagaaffiit Peqatigiit imavissuit aatsaat taama kissatsigineraraat
- Missingersuutit naammanngillat, qanorpiarlu pisoqarumaarnersoq taamaammat siulittuutigisinnaanngilarput. Allannguuteqangaatsiartoqarsinnaanissaali anigorsinnaagunanngilarput, immallu sikua aakkiartupiloorsinnaassaaq, tammavissinnaalluniluunniit, Martin Stendel oqarpoq.
Tamannali suli pinngitsoortinneqarsinnaasoq taanna oqarpoq. Silap pissusiata allanngoriartornera iliuuseqarfiginiarutsigu CO2-mik aniatitsinerput annikillisartariaqaripput Martin Stendel oqarpoq.
- Suliffissuaqarnermit aniatigitsinerit aniatitsiunnaapallatsissinnaagutsigit ajornerpaamik pisoqartinngitsoorsinnaavarput.
