Ilisimatuut COP25-ip aallartinnginnerani silap pissusia nikallunganartutut isigigaat
Naalagaaffiit Peqatigiit silap pissusia pillugu ukiumoortumik ataatsimeersuartitsisarnera, Spaniap illoqarfiisa pingaarnersaanni Madridimi ukioq manna pisussatut pilersaarutigineqarpoq. 25-ssaa ataatsimeersuartoqassaaq, COP25-millu tamanna pillugu taaguuteqarluni.
Isumaqatiginninniartartut, ministerit, immikkut ilisimasallit, suliffeqarfiutillit, inuinnaallu sunniiniaqatigiinneersut 20.000-init amerlanerusut, silap pissusiata allanngoriartornerata akiorniarneqarnissaa pillugu Madridimi sapaatip-akunnerini tulliuttuni marlunni ataatsimeersuassapput.
AAMMA ATUARUK Ilisimatuunit aarlerisaarut: Sermersuup allanngoriartornera unitsinneqarsinnaajunnaarsinnaasoq
Nunarsuaq pillugu, silallu pissusia pillugu nalunaarusiat ilaatigut nikallunganartut assigiinngitsut ukioq manna saqqummersinneqareersullu Madridimi ataatsimeersuartoqassaaq.
Immat 1 meterimik, annerusumilluunniit, ukioq 2100-nngortinnagu qaffannissaat, Naalagaaffiit Peqatigiit silap pissusia pillugu ataatsimiittartoqatigiivisa, IPCC-meersut, mianersoqqussutigaat, maannalu iliuuseqartoqartariaqavissoq oqaatigalugu.
Nunarsuaq ataatsimut isigalugu annerpaamik 1,5 gradinik kiannerulernissaanut siunniussat eqquutsinneqassappata, ullumikkut suliniutit tallimariaammik annertusarneqartariaqartut, ataatsimiittartoqatigiit tikkuarpaat.
AAMMA ATUARUK Nunarsuarmi aatsaat taama kiatsigisoq: Oktobarimi ukiuni 40-ni aatsaat taama kiatsigisoq
Silap pissusia pillugu Parisimi 2015-imi ataatsimeersuarnermi isumaqatigiissutigineqartut Madridimi ataatsimeersuarnermi nanginneqassapput, nunat assigiinngitsut silap pissusiata allanngoriartornerata akiorniarneqarnissaanut iliuuseriniagaat eqqartorneqassallutik.
