Ilisimatuunit aarlerisaarut: Sermersuup allanngoriartornera unitsinneqarsinnaajunnaarsinnaasoq
Issittumi sermersuup sikorsuillu aakkiartornerisa nunarsuarmi sumiiffiit avatangiisiisa allanngoriartornerattulli unitsinnissaat immaqa kingusinaalereerpoq.
Silap pissusianik ilisimatoorpaaluit taama aarlerisaaruteqarlutik oqaasii ilisimatuut atuagassiami Naturemi allaaserisami taama issuarneqartut, dr.dk allappoq.
Ilisimatuut nunarsuarmi sumiiffinni qulinguluani avatangiisit allanngoriartornerisa unitsinneqarsinnaajunnaalernerat aarlerisaarutigaat.
Piaarnerpaamik qanoq iliuuseqartoqartariaqartoq
Taamaattumik piaarnerpaamik qanoq iliuuseqartoqartariaqartoq, ilisimatuut oqarput.
Sikorsuit sermersuarlu aakkiartorunnaarsinneqarsinnaajunnaalersunut ilaapput. Taamaalippata sermersuaq sikorsuillu aassapput, aamma silap kianneruleriartorunnaarsinnissaanik illiuusissat naammassineqaraluartut.
AAMMA ATUARUK Issittup imartaa aatsaat taama sikunngitsigivoq
Nunat tamalaat silap pissusia pillugu ilisimatuussutsikkut paasisanik katersuisarfiata - tassa IPCC-ip - nunarsuarmi sumiiffiit qulingiluat avatangiisiisa silap pissusianit allanngoriartornerisa unitsinneqarsinnaajunnaalernerannik takussutissanik nalunaarusiai kingulliit saqqummermata, Ilisimatusartut taama oqaaseqarput.
Sumiiffiit ilaasa avatangiisii iluarsiffimmiileqqissinnaagunanngitsut
- Ukiuni kinguillerni 20-ni uuttortaasarpugut, assersuutigalugulu Kalaallit Nunaata sermersua aakkiartupiloortoq takusinnaavarput . Taamaattumik avatangiisit allanngoriartortut ilisimavarput, ilooraallu tungaanut ingerlanngillat, Katherine Richardson immap pissusia taasumalu immami uumasunut sunniutai pillugit Københavns Universitetimi professoriusoq ilisimatuullu dr-dk-mut oqaaseqartut ilaat oqarpoq.
AAMMA ATUARUK Nunarsuarmi aatsaat taama kiatsigisoq: Oktobarimi ukiuni 40-ni aatsaat taama kiatsigisoq
Nunarsuarmi sumiiffiit qulingiluat avatangiisiisa allanngoriartornerat qanoq unitsinneqarsinnaajunnaaqqajaaatiginersut nalornissutigineqartuarsinnatoq, Katherine Richardsonip erseqqissaatigaa. Ilaannut uatsiungallarsinnaavoq, ilaannulli pereerunarluni.
Issittumi sikorsuit Kalaallit Nunaatalu sermersuata saniasigut nunarsuarmi sumiiffiit qulingiluat avatangiisisa kianneruleriartorunnaarnerusinnaasumit annanneqarsinnaajunnaaqqajaasut tassaapput nunap qaava qeriuaannartoq, avannaarsuata orpippassui, sarfat Atlantikup imartaani ataqatigiinnerat, Amazonami orpippassuit, koraalit ikkanninnguuttut, Qalasersuup Kujalliup kippasissuani sermip ataa, taavalu kangisissuata ilaa.
