Ilisimatusarnermik ingerlatsivik Zackenberg ukiuni 20-ni

Ilisimatusarnermik ingerlatsivik Nunatta avannaarsuaniittoq Zackenberg ulluni makkunani ukiunik 20-nngortorsiorpoq.
Zackenberg Assi © : H. Spanggard, Aarhus Universitet
juunip 15-at 2015 04:57
Nutserisoq Simon Uldum -

Ilisimatusarnermik ingerlatsivik ilisimatuunit nunarsuarmit tamaneersunit aasat tamaasa tikinneqartarpoq, ilaatigut silap pissusiata allanngoriartornera, issittumi uumassusillit aammalu pinngortitami ataqatigiinneq ilisimatusarfigineqartarlutik, nittartagaq dr.dk taama allaaserisaqarpoq.

Silap pissusiata allanngoriartornerata sunniutaata ilisimatusarnermik ingerlatsiviup eqqaani malunnarnerpaajunera tamatumunnga pissutaavoq. Ilisimatuut taamaalillutik silap pissusiata allanngoriartornerata nunarsuup sinnerani siunissami sunniutivinnissaanut atatillugu qanoq pisoqarnissaa takusinnaavaat.

AAMMA ATUARUK Naalakkersuisut nunatta avannarsuani ilisimatusarsinnaatitsipput

Ilisimatuut ukiut ingerlanerini ilisimatuussutsikkut arlalippassuarnik paasisaqartarput, taakkulu ilaatigut tassaallutik silaannaap kissatsikkiartornerata Issittumi inuuniarnikkut atukkanik allanngortitsisinnaanera, tatsit issittumiittut uumassusilippassuaqarnerat aammalu umimmaat neriniartarnerisa silaannaap kissatsikkiartorneranut sakkortusaaqataanerat.

Ilisimatusarnermik ingerlatsivik Aarhus Universitetimi Institut for Biosciencemit ingerlanneqarpoq.