Ilisimatusarfimmit oqallissaarut: Naak ilinniartitaaneq pillugu oqallinneq?
Qineqqusaarnermi politikkikkullu ulluinnarni oqallinnermi ilinniartitaaneq pillugu susoqanngippallaarpoq.
Ilisimatusarfimmi siulersuisunut siulittaasoq, Suzanne Møller taama isumaqarpoq.
- Ilinniartitaanermut tunngatillugu ukkatarinninneq maanna qineqqusaarnermi nalinginnaasumillu oqallinnermi naammanngitsoq isumaqarpunga.
AAMMA ATUARUK Suleqatigiissitsisut inuit salliutikkaat: - Namminersulivinneq, aalisarneq aatsitassallu kisiisa salliuppaat
Ilinniarfinnut ingerlariaqqiffiusunut tunngatillugu politikerit iliuuseqarnerusariaqartut, Ilisimatusarfimmi aqutsisut siulersuisullu ataatsimoorlutik oqallisissiamik KNR-imut nassiussaminni kaammattuutigaat.
- Ilinniartitaaneq nunatsinni isumalluutit pingaarnersaasa ilagaat. Taanna agguaqatigiissillugu ukiuni inuuffigisassanut, peqqinnermut, aningaasaqarnermut inuunerullu pitsaassusaanut sunniuteqarpoq, taamaammat siunissamut qanoq ilinniartitsinitta ukkatariuarneqarnissaa pingaaruteqarluinnartuusoraara, Suzanne Møller oqarpoq.
Siulittaasoq: Ilisimatusarfimmut aningaasaliisoqarnerunissaa pisariaqarpoq
Nunatsinni inuit marluugaangata ataaseq qaffasinnerpaamik meeqqat atuarfiannik naammassinninnikuusimasarpoq. Meeqqalli atuarfiannik inuusuttunullu ilinniarfinnik taamaallaat ukkatarinnittoqarneratigut tamanna naammanngitsoq, siulersuisunut siulittaasoq isumaqarpoq.
Meeqqammi atuarfiinut inuusuttullu ilinniarfiinut ilinniartitsisussat Ilisimatusarfimmi ilinniarsimasuusinnaapput, taamaammallu ilinniarfiit ingerlariaqqiffiusut ukkatarineqarnissaat aamma pisariaqarpoq.
- Ilisimatusarfiup bachelorinngortitai kandidatinngortitaalu malingaasiatut siaruartarput. Susassaqarfimmiillumi ataassimiit allamut ingerlaqqittarput, Suzanne Møller oqarpoq, nangillunilu:
AAMMA ATUARUK Qinersisartoq Nuummi qineqqusaartoqarnerani: Ilisimasaqarnerungaalinngilagut
- Ilinniartitaanermi kivitsinissaq qulakkiinngikkutsigu ilinniarnerup 1. klassimit ilisimatusarfimmi ilinnialernissatut isigissavarput, taamaalillutalu nunatsinni inuusuttunut nammineerluta ilinniartitsinngitsoorluta ilinniagartuunik tikisitsisarnerput ingerlatiinnaratarsinnaavarput.
Suzanne Møllerip oqarnera naapertorlugu Ilisimatusarfimmut ukiuni kingullerni qulini amerlanerusunik aningaasaliisoqanngilaq, aningaasallu taama amerlatigiinnaraluartut ilinniartut amerlassusaat marloriaatinngorsimapput. Tamannali ilungersunartorsiortitsivoq.
- Tamannali Ilisimatusarfiup aningaasanik atuilluarnissamik qulakkeerisimaneranik aamma isumaqarpoq, taamaammat suli ineriartorsinnaanissatsinnut susassaqarfimmut tassunga aningaasaliisoqarnerunissaa pisariaqarpoq, siulersuisunut siulittaasoq oqarpoq.
