Qinersisartoq Nuummi qineqqusaartoqarnerani: Ilisimasaqarnerungaalinngilagut
Kommunimut qinersisoqannginnerani qineqqusaarneq kingulleq Nuummi GUX-imi ingerlanneqarpoq.
Kommuneqarfik Sermersuumut partiinit arfinilinnit qinigassanngortittoqarpoq. Tassa Inuit Ataqatigiit, Siumut, Naleraq, Nunatta Qitornai, Atassut Demokraatillu.
Partiinut tapersersuisorpassuit tapersersuinerminnik takutitsiartorlutik peqataapput. Aamma innuttaasut ataasiakkaat malinnaajartorlutik qineqqusaartunullu apeqquteqariartorlutik takkupput.
Ullormi qineqqusaarfiusumi sammisat meeqqat atuarfiinit mittarfinnut tunngasuupput.
Kaj Sandgreen Nuummeersoq qineqqusaartunut apeqquteqaqqaartuuvoq.
AAMMA ATUARUK Kommunimut qinersineq: Kommuneqarfik Sermersuumi qinigassanngortittut
Taassuma angajoqqaat meeqqami ilinniagassaanut malinnaanissaannut ajornannginnerulersitsinermik kina suliaqarusunnersoq paaserusuppaa. Taassuma nammineerluni ilinniartitsisumit angajoqqaamut meeqqap ilinniagassai pillugit elektroniskimik assersuutigalugu SMS-imik allagarsiisoqarsinnaanera siunnersuutigaa.
SMS-imik nassiussineq assigiinngitsunut atassuteqarnermi aamma atorneqarsinnaasoq oqaatigaa, oqarasuaammi angallattagaq qarasaasiaq atorlugu atuarfiup intranetsianut isernermit ajornaanneruvoq.
- SMS-imik siunnersuuteqarnera piffissamik atuiffiuvallaassasoraat, naak tamanna periarfissaagaluartoq. Amerlanerit oqarasuaammik angallattagaqarput, paasissutissallu assigisaat oqarasuaat angallattagaq atorlugu pissarsiarineqarsinnaapput.
- Oqaannarsinnaanngillat ajornartoq.
Qineqqusaartut ilaata angajoqqaanut app-imik taassuma siunertaata assinganik peqareersoq oqaatigaa.
Kaj Sandgreen allamik aamma apeqquteqarpoq, taanna højskolimik pilersitsinissamut tunngavoq. Qineqqusaartullu apeqqut taanna Inatsisartunut qineqqusaartunut apeqqutigineqartariaqartoq oqaatigipallappaat.
Paamiut aamma mittarfiit
Benny Kokholmip qineqqusaarnerpassuit ukiut ingerlaneranni malinnaaffigisarpai, taannalu Paamiunut mittarfianullu tunngasumik apeqqutissaqarpoq.
Paamiut 2007-imi mittarfittaarpoq. Benny Kokholmillu oqarnera naapertorlugu mittarfik pissutigalugu illloqarfimmik ineriartortitsisoqalerumaartoq taamani oqallisigineqarpoq. Ineriartortoqarsimanngitsorli oqaatigaa, taamaammat tassunga atatillugu suna ajoqutaasimanersoq aamma Paamiuni ineriartortitsisoqarnissaanut qanoq iliortoqarusunnersoq paaserusuppaa.
- Tamanna Paamiunut qanoq kinguneqarpa? Suliffissuaqarnermi, sanaartornermi, takornariaqarnermi allanilu ineriartorneq Paamiunut anngutinngilaq. Takussutissaqalersitsiniarneq qanoq iliuuseqarfigineqarniarpa?
- Akissutersinngilanga. Akissut tusarnikuungaarakku piareersimaffigisara pissarsiaraara. Apeqqutigisamut akissuteqarnatik allamik eqqartuisarnerat ileqquuvoq.
Benny Kokholmip qineqqusaartunit akissuteqanngiinnarnermit unneqqarissumik akissuteqartoqarnissaa kissaatigigaluarlugu oqaatigaa.
- Immaqa marloriarlunga pingasoriarlungaluunniit ersarissumik toqqaannartumik akissutersinikuuvunga. Aappaa danskisut sapaatip akunnerata siuliani qineqqusaartoqarnerani pissarsiaraara, tassani qineqqusaartoq nutaaq ima akissuteqarpoq: ”Politikeritut takisuumik akissuteqarsinnaagaluarpunga, kisianni unneqqarinniarpunga, taamaammat ilinnut akisssutissara tassaavoq, ilisimanngilara”.
- Akissutaalluartuusoraara – tassa nassuerutigalugu kommunimut Inatsisartunulluunniit qineqqusaaraluaraanniluunniit ilisimatuunngortoqarnavianngilaq. Soorunami sammisanik 789.000-inik ilisimanngisaqarput, pingasunillu aalajangikkaluartut ilungersuussassaqarusullutik. Taamaakkaluartoq apeqquteqartoqaraangat silasuusaalertarput, tassa oqalunniaannarlutik inunnillu malugitinniaannarlutik.
Qineqqusaarutigineqartut allat initoorujussuusut
Bikki Kleist Jepsenip Kommuneqarfik Sermersuumi utoqqaat puiguttortullu atugaat ernumanartippai. Taassuma kommunimi utoqqarnut piffissamut sivisuumik pilersaarusiortoqarnissaa pisariaqarsoraa, taamaalilluni utoqqalinersiuteqalernissaminut toqqissisimasutut misigisinnaalissalluni.
Taassuma oqarnera naapertorlugu kommunimi utoqqaat illuanut nuukkusuttut utaqqingaatsiartarput.
Taassuma partii Siumut apeqquteqarfigaa.
- Kommunalbestyrelsimi ukiuni tulliuttuni sisamani allanngortoqarnissaa takorloorpara. Utoqqaat illuannik nutaamik peqalernissaa takorloorneqarpa? Utoqqaat pillugit piffissamut sivisuumut pilersaaruteqarpa? Puiguttortunngortorpassuit qanoq iliuuseqarfigineqarniarpat?
- Pissutigalugu utoqqaat qineqqusaarnermi oqallisigineqartuarput, utoqqaalli qinersisoqareernerata kingorna pakatsiuaannarput. Puiorneqartutummi misigisimapput.
Siumumit kissaatigisannik akissutissarsivit?
- Qineqqusaartup apeqquteqarfigisama tamanna itinerusumik akissuteqarfiginissaa piareersimaffiginngikkaa misigisimavunga.
- Kina qinissanerlugu suli nalornissutigaara. Amerlasuut TV-kkut malinnaaffigigaluarpakka, amerlanerilli Kuannersuarnut mittarfinnullu tunngapput. Uagummi inuit? Uagut salliutinneqartariaqaraluarpugut. Uagut nunarsuarmi piviusumi inuusut.
Qinersisartoq qineqqusaartunit akissutersisoq tassaavoq Job Heilmann Nuummi piniartut aalisartullu peqatigiiffiannit, NAPP-meersoq.
Taassuma piniarnermut aalisarnermullu atortunut pingaartumik ukiukkut toqqorsivissaqarnerunissartik kissaatigaa.
- Aalisartut ikittuinnaat atortorissaarutiminnut queqarput. Amerlanerit peqanngillat. Taamaammat atortui sumi tamaaniiginnartarput. Tamanna ajornarnerulersitsingaatsiartarput, taamaammat amerlanerusunik ukiukkut queqarnissaa pitsaassagaluarpoq.
Naak qineqqusaartut taassuma kissaataa isumaqatigigaluaraat taanna ersarissumik akissutersisutut misigisimanngilaq.
- Akissutaat ajunngikkaluarput, kisianni itinerusumik akissuteqarsinnaagaluarput. Akissutaat pakatsinalaarput.
- Amerlanerit isumaqataarpalaarlutillu neriorsuuteqaraluarput. Taamaammat neriuppunga atorneqarsinnaassasut.
