Ilisimatooq Greenland Mineralsip innuttaasunik ataatsimiititsinernut peqataaniarunnaarnera pillugu: Nallinnartutut imminnut inissipput
- Innuttaasunik aatsitassarsiornissamut akuersissummik tunniussinissaq pillugu ataatsimiititsisoqarnerani aatsitassarsiutileqatigiiffiup peqataannginnera aatsaavissuaq tusarpara.
Anne Merrild Hansen, Ilisimatusarfimmi Aalborgillu Universitetsiani suliniutit angisuut pillugit professoreq oqarpoq.
Kuannersuarni suliniut pillugu paasissutissat piviusut:
- Kuannersuit Narsap kilometerinik 7,5-inik ungasitsigisumi avannarpasissortaaniippoq.
- Aatsitassarsiorfik asimi 700 meterinik qutsitsigisumiipppoq.
- Greenland Mineralsip aatsitassarsiorfk ukiuni 37-ni piiaaffiginiarpaa.
- Aatsitassarsiorfiup piiaaffigineqarnerani nunaqavissunik 328-nik suliffissaqartitsisoqarsinnaassasoq naatsorsuutigineqarpoq.
- Aatsitassarsiorfik qaqutigoortunik ilaatigut uranimik thoriumimillu saffiugassaqarpoq.
- Aatsitassarsiorfik saffiugassiassamik ukiumut millionit tonsit pingasut missaannik piiaaffiusassaaq.
- Ukiuni 37-ni aatsitassarsiornermit sinnikut 111 millionit tonsiussapput qaarsorlu (qaarsumit piiarneqartumit sinnikut) 111 millionit tonsiussalluni.
Tusarfiit: Greenland Mineralsip ASN-ia ISN-ialu.
Kuannersuit pillugit innuttaasunik ataatsimiititsineq siulleq ippassaq pivoq. Ingerlatseqatigiiffimmiilli Greenlands Mineralsimit aallartitanik peqataasoqanngilaq.
Aatsitassanut naalakkersuisoq, Naaja Nathanielsen (IA) ataatsimiinneq ammaramiuk, apeqqutit aatsitassarsiornissamut suliniummut tunngasut tamarmik, Greenland Minerals peqataanngimmat akineqarsinnaassanngitsut oqarpoq.
AAMMA ATUARUK Politiit: Innuttaasunut ataatsimiisitsinissami ernumanartoqanngitsoq
Greenland Minerals naapertorlugu, ingerlatseqatigiiffik sulisumik aallartitassamillu isumannaassusaannut aarleqquteqarpoq. Taamaammat ingerlatseqatigiiffik innuttaasunik ataatsimiititsinernut peqataaniarunnaarluni nalunaarpoq.
Anne Merrild Hansenili isumaqarpoq, aatsitassarsiornissamut suliniut piviusunngulinngikkallarmat ingerlatseqatigiiffik peqataarusukkunnaartoq. Naalakkersuisoqatigiimmi Inuit Ataqatigiit Nalerarlu aatsitassarsiornissamut suliniut unitsinneqassasoq neriorsuinikuummata.
- Oqartoqarsinnaavoq innuttaasunut ataatsimiititsinermut peqataanissaq taakkununnga soqutiginanngitsoq, pissutigalugu inuit politikkikkulluunniit isummat allanngornissaat maanna ilimananngimmat.
- Ajorsarput. Taakkua tungaanniit iliuusissaq tulleq tassaasinnaasoq eqqartuussivimmut suliassanngortitsineq.
Nilliaffigineqaqqikkusunngitsut
Akerlianilli aamma ingerlatseqatigiiffiup ataatsimiinnernut peqataarusunnginnera paasilluarsinnaavaa. Suliniummi najugaqartorpassuarnit akerlerineqaqaaq.
Narsami innuttaasunik februaarimi ataatsimiititsinerni peqatigiiffik Urani Naamik aatsitassarsiornissamut suliniut pillugu akerliussutsimik takutitsivoq.
- Innuttaasunik ataatsimiititsinernut peqataassagunik ataasiarlutik akerartorneqaqqissapput, inuit pakatsinerminnik naammagisimaarinninnginnerminnillu takutitsinissaminnut periarfissaqalissapput. Inuit akerlerisaannik suliniuteqareersimagunik peqataaqqinnissaq nilliaffigineqarnissarlu orniginartissimanavianngilaat.
Anne Merrild Hansen isumaqarpoq, Greenland Mineralsip peqataaniarunnaarnera aamma isumaqartoq, kikkut tamarmik isumaat ataatsimiinnerni tusarneqassanngitsut.
AAMMA ATUARUK Greenland Mineralsip eqqartuussissuserisut aatsitassarsiornermik suliniummik misissuisikkai
- Innuttaasunimmi ataatsimiititsinerit tassaapput, inuit tusarneqarnissaannut tunngasut, soorlu suliniutini siunissami inuunermut tunngasuni aalajangiisuusinnaasuni.
- Greenland Minerals peqataanngilaq, innuttaasunik ataatsimiititsineq piitsunnguallappoq. Oqaloqatigiinnissamut periarfissakillisoqarpoq.
Aatsitassanut naalakkersuisoq, Naaja Nathanielsen (IA) Inatsisartut ukiaanerani ataatsimiinnissaanut uranimik inerteqquteqarnissamik inatsisissatut siunnersuummik saqqummiussissaaq.
- Greenland Mineralsip allakkami nassiussaminni imminnut nallinnartutut inissipput. Innutaasunut ersipput aamma suliniut pillugu aalajangiinissamut naammagisimaarinninngillat.
Ingerlatseqatigiiffik peqataanissaminut inatsisitigut pisussaaffeqanngilaq.
Naalakkersuisut naapertorlugit innuttaasunik ataatsimiititsinerni apeqqutit tamaasa allattorneqarassapput.
Taakkua nalunaarsuiffinnut allattorneqassapput.
Nalunaarsuiffik taanna allaffissaavoq, apeqqutinik ernummatinillu ingerlatseqatigiiffiup akisassaanik imalik.
KNR Greenland Mineralsimit oqaaseqartitsiniaraluarpoq. Saaffiginnissulli ingerlatseqatigiiffimmit qisuariarfigineqanngilaq.
