Ilisimasanik avitseqatigiittarnissaq qulakkeerniarlugu nittartagaliartoqarpoq
Ulloq unnuarlu paaqqinnittarfiit ataasiakkaat pillugit paasissutissat, nakkutilliinermi nalunaarusiat kingulliit, kiisalu aaqqissuussaanermut nassuiaatit sukumiinerusut www.uupi.gl-imi atuarneqarsinnaapput. Aamma ulloq unnuarlu paaqqinnittarfeqarnermi attuumassuteqartunut ingerlaqqiffissaqarpoq, aamma nalunaarusiat ilisimasallu nutaat www.uupi.gl-ikkut pissarsiarineqarsinnaalissallutik. Inatsisisiliorneq isumaqatigiissutillu susassaqarfimmut attuumassuteqartut aamma nittartakkami atuarneqarsinnaapput.
-Ulloq unnuarlu paaqqinnittarfeqarnerup 2011-mi misissuiffigineqarneranut atatillugu Deloitte kaammattuuteqarpoq. Tamatumalu malitsigisaanik ulloq unnuarlu paaqqinnittarfeqarnermi attaveqaqatigiinnerup ilisimasanillu avitseqatigiittarnerup pitsanngorsaaviginissaat siunertaralugu nittartagaq suliniutinut arlalinnut atasumik suliarineqarpoq. Suliniutit taakku pingaartinneqarput suliniutillu arlariit imminnut tapertariissinnissaat siunertarineqarluni, Tina Dam Rasmussen Ulloq unnuarlu paaqqinnittarfinnut immikkoortortaqarfimmeersoq knr.gl-imut oqarpoq.
Nittartagaq maanna saqqummersinneqarpoq atorneqarnissaanut ikorfartuutaasumik suliniutinut allanut naleqqussarneqarsimanera pissutigalugu. Ilaatigut KNR-ikkut tv-kkut akunnermiliussassatut aallakaatitassiaqarpoq, taakkunanilu paaqqinnittarfinni sulineq sammineqarpoq, taamaasillunilu ulloq unnuarlu paaqqinnittarfimmi sulinerup nuannersortaa immikkut sammisaqarluni. TV-kkut aallakaatitassiat susassaqarfimmut sulisussanik ilinniarsimasunik, piginnaanilinnik piumassusilinnillu pilerisaarinissaq siunertarineqarput. Taamatut paasititsiniaaneq nittartakkamut, ilaatigut perorsaasunngorniarluni ilinniartitaaneq pillugu paasissutissanik imaqartumut innersuussiffiuvoq.
Nittartakkap suli inerisarneqarnera erseqqissaatigineqarpoq, ineriartortinnissaalu pitsanngorsarnissaalu ingerlaavartumik sulissutigaarput. Nittartakkap siusinaartumik saqqummersinnissaa toqqarsimavarput, paasissutissanik atuisut soqutigisallit atorluarsinnaasaannik amerlasuunik imaqareermat.
-Nittartagaq ulloq unnuarlu paaqqinnittarfeqarnermi soqutigisalinnut tamanut saaffiginnittuuvoq.
Anguniakkatta pisariaqartitaat naammassiniarlugit soorunami toqqaasariaqarsimavugut aammalu taamaatitsiinnartariaqarsimalluta. Assersuutigalugu sullissisut nunatsinni paaqqinnittarfiit pillugit imaluunniit inatsit aalajangersimasoq sukkasuumik paasisaqarfiginissaannut atorsinnaavaat, Tina Dam Rasmussen oqarpoq.
