Ilisimasalik: Urani Nunatsinneersoq sumut pisarumaarnersoq nalunartuassaaq
- Urani piialerumaarsinnaasarput, siunertanut sorsunnermik ilaqanngitsunut atorneqassaaq, allanuunngitsoq. Tamannalu kisiat soqutigisaraarput, Greenland Minerals & Energymi paasissutissiinermut pisortaq, Erik Holmsgaard, oqarpoq.
Qanormi ililluni atortussusiaq taanna ulorianartumik qingornilik inunnut ajortumik atuininngitsinut ilumut apuutissanersoq qularnaarneqassava?
- Urani aqqusinermukaannariarluta tuniniarsinaanngilarput. Tuniniarnissaanummi malittarisassaqarpoq, nunanit tamalaanit atuutilersinneqarsimasunik, atomillu atorlugit atortussiutit sorsunnermut atorneqannginnissaat pillugu nunat tamalaat suleqatigiiffiata atuutsinniagaanik. Tassalu soorunami malittarisassat tassani atuuttut maleqqissaassavagut, Nunatsinnilu aalajangerneq aamma malissallugu. Nunatsinnilu qanoq aalajangertoqassanersoq suli naluarput, Erik Holmsgaard akivoq.
Kisianni Nunani tamalaani pissutsinik Danmarkimi ilisimatusarfimmi ilisimatooq, illersornissamut isumannaallisarnermullu immikkut ilisimasalik, Cindy Vestergaard, aperigaanni, taama piuminartiginngilaq.
Tassami Nunarput Danmarkilu nunanut allanut tuniniaanermut nakkutiginiffimmik pitsaasumik pilersitsigaluarpataluunniit, Nunarput atomi atorlugu sakkussuiornermut peqataalersoorsinnaavoq. Immikkummi ilisimasalik naapertorlugu uranimik tuniniaaneq assigiinngitsunik tuniniaavinnut allanut naleqqiullugu nakkutiginiaruminaannerpaavoq.
Taamaammat urani kikkunnorpiaq tuniniarneqarsinnaassanersoq, Nunarput Danmarkilu aallajangertariaqarput.
Taamaakaluartorli malittarisassat suli putoqarput. India assersuutigeriartigu. Taanna uranimik sorsunnerunngitsumut atugassamik pisinissamut akuersissummik peqarpoq. Kisianni tassunga uranimik tunisigaanni isumaqarluni, taamaallaat innaallagissiornermut atoniaraat, taava Nunatsinniit uranisiartik qaartartuliornermut atussappassuk akornutissartaqanngilaq. Tassami nakkutilliiartortartut malittarisassaanni sakkutooqarnermi atortussiat ilaanngitsut, Cindy Vestergaard nassuiaavoq.
- Uranimik avammut tuniniaaneq nalorninartoqartuaannassaaq, ilisimatooq erseqqissaavoq.
- Naalagaaffiit atomiutillit qanorluunniit iliorsinnaapput. Tamanna tuniniaasut eqqaamajuartariaqarpat. Australiamiullu, USA-mut uranimik ukiuni 30-ni tunisisarsimasut, aperigaanni, ilumut nalunnginneraat, urani tunisartik sakkussiornermut atorneqanngitsoq, taava akissapput: “Naamik, tamanna qularnaavissinnaanngilarput”, Cindy Vestergaard Informationimut oqarpoq.
