Ilinniartut: Malittarisassat allammiutut pivaatigut
Kalaallit inuusuttut ilinniagaqarniarlutik Danmarkimut nuukkaangamik, Kalaallit Nunaanni qinersinissaminnut pisussaaffeeruttarput, tamanna tigummiinnarniarlugu kommunerisaminnut qinnuteqarsimanngikkunik. Februaarilli ulluisa 19-iat nallertinnagu qinnuteqanngitsoorsimagaanni, marsip ulluisa aqqaneq-aappaanni qinersisinnaanngillat. Ilinniagaqartullu arlallit maanna taama inissisimapput. Qinersisartunik Kalaallit Illuutaanni Københavimiittuni ippassaq ataatsimiititsinermi tamanna erserpoq. Qineqqusaaqataasup Demokraatit siulittaasuata Jens B. Frederiksenip paasiniarpaa qassit qinersinissaminnut kommunerisaminni allatsissimanersut, aamma qassit allatsissimannginnersut.
Qinersisinnaasut armerlagaluartut arlallit allatsikkiartunngitsoorsimasut. Avalammi siulittaasoq Hans Peder Kirkegaard isumaqarpoq Danmarkimiit taaseqataasinnaaneq ajornakusoorpallaartoq.
- Malittarisassat atuarluarsimanngikkaanni paasiuminaapput. Immersugassaq immersorneqartussaavoq atsiorsinnarlugulu nassiullugu. Email-ikkut nassiutiinnarneqarsinnaasuuppat qinerseqataasut amerlanerussagaluarput, oqarpoq.
Taassuma orniginerugaluarpaa kalaallit Danmarkimi ilinniartunngoraangamik taasisinnaanerminnik piginniinnartarnissaa - tassa qinersiniaraagamik qinnutigeqqaartussaassanagu.
- Malittarisassat allamiutut pivaatigut. Iluassagaluarpoq malittarisassat kalaallisut allatulli pisuuppatigut naak nunarput qimallugu ilinniariartorsimagaluartugut, Hans Peder Kirkegaard oqarpoq.
Inuit 90-it missaa ippassaq Københavnimi qineqqusaarnermi najuupput. Taassuma saniatigut marlunngornermi unnukkut Aarhusimi qineqqusaartoqarpoq.
Demokraatineersoq Anda Uldum Inatsisartut upernaakkut katersorneranni siunnersuuteqarpoq kalaallit Danmarkimi ilinniagaqartut oqartussaaqataanerat pitsanngorsarniarlugu. Tamatuma kingorna qinersisinnaanermut periarfissaqalernissamut killigititaasoq sapaatit akunnerinit arfinilinniit pingasunngortinneqarpoq. Tassunga peqatigitillugu ilinniartut oqartussaaqataanikkut periarfissaasa nukittorsarnissaat Naalakkersuisut misissorniarlugu neriorsuutigaat.
Demokraatit siulittaasuat Jens B. Frederiksen malillugu Demokraatit sulissutigaat ilinniartut Danmarkimut ilinniariartornerminni taasisinnaanerminnik annaasaqartannginnissaat.
