Ilinniartitaanikkut siunissarput qulakkeerniarpaat
Inuusuttut akornanni suliffissaaleqinerujussuaq naalakkersuisut aamma isumanerluutigaat. Ajornartorsiut pingaarneq tassaavoq meeqqat atuarfiata qimannerani 37 procentit ilinniakkamik aallartitsineq ajormata. Taamaammat meeqqat atuarfiata nukittorsarnerata ingerlaqqinnissaa Naalakkersuisut siunniuppaat.
Naalakkersuisut anguniarpaat 2025-mi meeqqat atuarfianniit ilinniakkamik aallartitsisut 70 procentimiilersimassasut.
- Ilisimavarput meeqqat atuarfiata sinaakkutai pitsaavallaanngitsut, Naalakkersuisut siulittaasuat Kuupik V. Kleist oqarpoq, innersuullugulu atuarfippassuit iluarsaattariaqalersimanerat aammalu k0llegianik pisariaqartitsineq.
- Taamaammat aalajangerpugut isertitat nutaat meeqqat atuarfiannut ilinniartitaanermullu atorneqassasut. Sipaarniarnermi aningaasat pissarsiat aamma Namminersorlutik Oqartussat suliffeqarfiinik tunisaqassagaluarutta isertitat siunertamut tassunga atorneqassapput, Kuupik V. Kleist oqarpoq.
Inuusuttut 16-it 18-illu akornannik ukiullit ilinniakkamik aallartitsisimanngitsut amerlapput. Kisitsisillu takutippaat suliffissaaleqisut 90 procentii ilinniarsimanngitsuusut.
Naalakkersuisut aamma misissorniarpaat suliffissaaleqisut suliffissuarni suliffissanik innersuunneqaluartut sooq suliumanngittarnersut.
- Paaserusupparput suliffiup pilerinanngitsuunera imaluunniit aningaasarsiat tassani aporfiusarnersut, Kuupik V. Kleist oqarpoq.
Naalakkersuisut aamma maluginiarpaat tikisitarpassuit suliamut aalajangersimasumut ilinniarsimasuunngikkaluartut tikisinneqartartut.
- Suliffeqarfiit taamatut tikisitsisut attavigaavut tassanilu paasivarput taamatut tikisitsisartut ullaakkut piffissaq eqqorlugu takkuttarmata, Kuupik V. Kleist oqarpoq.
Naalakkersuisut aalajangerput ajornartorsiutilinnik suliffeqalersitsiniarnermi imigassamik ajornartorsiutillit ikiorneqartassasut.