Ilinniartitaaneq qitiulluinnarpoq
Nunatsinni aningaasaqarniarneq imaannaanngitsunik unammilligassaqarpoq. Uuliasiorneq unikaallassimaarpoq raajartassallu ikinnerulerlutik. Taamaattoq Naalakkersuisut siunniuppaat aningaasut inatsisip oqimaaqatigiinnissaa.
Pissutsit suli 2025-mi ajornerulersinnaapput maannakkut arlaannik iliuuseqartoqanngippat, aningaasaqarnermut naalakkersuisoq Maliina Abelsen aningaasanut inatsissatut siunnersuut tusagassiortunut saqqummiukkamiuk oqarpoq.
Ullumikkut meeqqat inuusuttullu amerlasuut angerlarsimaffiup avataanut inissinneqarsimapput, meeqqat atuarfianniit soraarummeertut 2/3-ii ilinnialernissaminnut piginnaasamikkut inorsarput.
Taamattumik isumaginninnerup iluani siusissukkut iliuuseqarnissaq, ilinniartitaanerup nukittorsarnissaa aammalu suliffissaaleqinerup akiornissaa naalakkersuisunit pingaartinneqarput.
Taamaattoq siunissaq ungasinnerusoq isigalugu pilersaarut sukumiisoq Maliina Abelsenip saqqummiutinngilaa. Taanna naalakkersuisut septemberip 20-ani saqqummiunniarpaat.
Taamaattoq Maliina Abelsenip oqaatigaa ilinniartitaanermut ileqqaarutit ukiut aggersut 30 millioner koruuninut qaffanneqassasut. Tamanna ilaatigut aningaasalersorneqassaaq Nukissiorfinnut tapiissutit ukiumut 10 millioner koruuninik ilanngarnerisigut.
Naalakkersuisut aamma naatsorsuutigaat 17 millioner koruunit sipaarsinnaassallugit kalaallit Danmarkimi ilinniartut Danmarkimi SU-mut nuuppata. Tamanna pisinnaavoq nunatsinnut angalasinnaanermut tapiiffigitittarneq atuakkanullu tapiiffigitittarneq annaanngikkaluarlugit.
Naalakkersuisut aamma assut isumalluarfigaat Nuup kangerluani Isuani aatsitassarsiorneq. Maanna qalluinissamut qinnuteqaat tunniunneqareerpoq qalluinerlu aallartippat suliffippassuit pilersinneqartussaapput.
- Kisianni Isuani aatsitassarsiornissamit isertikkumaakkat missigersuusiornermi ilaanngillat. Aningaasat suli tigoriaannaanngitsut missigersuusiornermi atorsinnaanngilagut, Maliina Abelsen oqarpoq.
