Avalak: Ilinniagaqarnersiutit pillugit siunnersuut ilinniagaqartunut ajorluinnarpoq
Danskit naalakkersuisui ilinniagaqarnersiuteqartitsinerup aaqqissugaanerata malunnaatilimmik allanngortiteriffigineqarnissaanik siunnersuuteqarput. Naalagaaffimmit stipendiatut tunniunneqartartoq millisinniarneqarpoq, illuatungaatigullu ilinniagaqartut taarsigassarsiaqarnerunissamut sulinerunissamullu periarfissinniarneqassallutik.
Danskit naalakkersuisuisa siunnersuutissaat Kalaallit Danmarkimi ilinniagaqartut peqatigiiffianni Avalammi sisamanngormat unnukkut oqallisigineqarlutik ataatsimiissutigineqarput. Avalaap isumaqatigiinniartartua, Maria Kahlig, taama oqaluttuarpoq.
- Tusagaq nuanninngitsuuvoq. Allannguutiginiarneqartummi kalaallinut Danmarkimi ilinniagaqartunut ilinniakkamillu ingerlaqqiffiusumik naammassinninnissaannut periarfissaannut sunniuteqartupilussuussaaq, KNR-imut oqarpoq.
Aamma atuaruk Danmarkimi kalaallit ilinniagaqartut ilinniagaqarnersiutitigut eqqugaasinnaasut
Avalammeersut isumaqarput Danmarkimi atugarissaarnerup aaqqissugaanera tamarmiusoq allanngortinniarneqartoq.
- Allannguutissatut siunnersuutigineqartut Danmarkimi atugarissaarnerup aaqqissugaaneranik paasinnittaatsitsinnik allanngortitsissaaq malunnaatilimmik. Sungiusimavarpummi kikkut tamarmik ilinniagaqarnissaminnut assigiinnik periarfissaqartinneqartut, aamma pisuunik ilaqutaraluaraanniluunniit.
Danskit naalakkersuisuisa siunnersuutaat ilinniagaqarnersiutinuinnaq tunngassuteqanngillat. Ilinniakkaminnimmi nammasserlaat ukiuni siullerni pingasuni sulinermut ilanngaammik qaffasinnerusumik neqeroorfigineqartassapput. Neqeroorulli taanna atussagaanni Danmarkimi najugaqarnissaq pisariaqarpoq.
Ilinniartitaanermut naalakkersuisup Nivi Olsenip kalaallit Danmarkimi ilinniagaqartut ilinniakkaminnik naammassinninnerminni nunatsinnut utertinniarnissaannut nunatta periarfissaanut akornutaassasorinngilaa.
Aamma atuaruk Nivi Olsen: Ilinniartut ajalusoornissaat naatsorsuutiginngilara
Avalammili tamanna isumaqataaffigineqanngilaq. Taakkumi ilinniartut angerlartinnissaasa ajornakusuulernissaa ernummatigaat, ukiuni siullerni pingasuni akileraarnikinnerullutik Danmarkimiiginnarsinnaassammata.
- Ilinniartut nunatsinnut sapinngisamik sukkanerpaamik utertarnissaannik kissaateqarnermut naapertuutinngilaq. Kalaallit Nunaata aningaasaqarneranut ilungersorfioreersumut toqqaannanngikkaluartumik akornutaassaaq, Maria Kahlig oqarpoq.
Sulinermulli ilanngaatip ilinniartunut naammasserlaanut immikkut ittumik qaffanneratigut amerlanerit Nunatsinnukarusunnerussasut, Sulisitsisut Peqatigiiffiat isumaqarput.
- Kalaallit Nunaanni sulinermi ilanngaateqalernikkut aaqqiissuteqartoqarsinnaavoq. Kalaallit Nunaanni Danmarkimilu ilinniarsimallutik sulilerlaanut immikkut ittumik ilanngaatip qaffanneqarneratigut aaqqissuussineq ataqatigiilersinnaavoq, Karsten Klausen, Sulisitsisut Peqatigiiffianneersoq, oqarpoq.
linniakkani ingerlaqqiffiusuni SU-mik pisartagaqarneq
SU ullumikkut qaammammut akileraarutit ilanngaatiginagit 5.941 koruuninik aningaasartaqarpoq. Danskilli naalakkersuisuisa taakku akileraarutit ilanngaatiginagit 4.753 koruuninut ikilisinnialersaarpaat. 800 koruunit nikingassutaapput.
Ilinniagaqartulli qaammammoortumik akileraarusigaanngitsumik ernialigaanngitsumillu 4.344 koruuninik taarsigassarsisinnaalissapput. Taakku ullumikkumut naleqqiullugit 1.300 koruuninik amerlanerupput.
Taamatut aaqqissuussisoqarneratigut qaammammut isertitarineqartut 500 koruuninik amerlineqarsinnaassapput.
Ilinniagaqarnersiutilli amerlanersaat taarsigassarsinermit pisassapput, taakkulu danskit naalagaaffiannut kingorna taarserneqartussaassallutik.
Taarsigassarsiaqarsinnaanermik periarfissaq atoraanni ukiumut taarsigassarsiarineqartut katillugit 52.000 koruuniussapput. Ullumikkut ukiumut annerpaamik 36.500 koruuninik taarsigassarsisoqarsinnaavoq. Taarsigassarsiat ilinniarnerup nalaani erniaqartinneqassanngillat.
Ilinniagaqartut ilinniarnermik saniatigut sulinerminni qaammammut isertitarisinnaasaat 11.992 koruuninit 12.992 koruuninut qaffaavigineqassapput.
Najoqqutarisaq: Danmarkimi Ilinniartitaanermut Ilisimatusarnermullu ministereqarfik
