Nivi Olsen: Ilinniartut ajalusoornissaat naatsorsuutiginngilara
Kalaallit ilinniartut allannguinerujumaarsinnaasut ajalusoorutiginavianngikkaat, Ilinniartitaanermut naalakkersuisoq, Demokraatineersorlu, Nivi olsen isumaqarpoq.
- Isumaqarluinnarpunga ilinniartuutigut sapinngilluinnartut malinnaassallutik. Danmarkimi atugassarititaasut aamma atorlugit ajornerusumik tunnissaat, immaqaluunniit ajalusoornissaat, taanna naatsorsuutiginngilluinnarpara pissasoq, naalakkersuisoq oqarpoq.
Danskit ilinniartitaanermut ministeriata Ulla Tørnæsip siunnersuut 'ilinniagaqarnersiuteqartitsineq qajannaannerusoq' 2019-imi eqqunneqartussaq marlunngormat saqqummiuppaa.
Ilinniagaqartut ilinniagaqarnersiutaasa 20 procentinik ikilisinneqarnissaat danskit naalakkersuisuinit siunnersuutigineqarpoq.
Aamma atuaruk Danmarkimi kalaallit ilinniagaqartut ilinniagaqarnersiutitigut eqqugaasinnaasut
Siunnersuutilli taamaattut suli atuutililinngimmata qanoq ittunik kinguneqassanersut, Naalakkersuisut suli misissoraat, naalakkersuisoq erseqqissaavoq.
- Siunnersuut suli aalajangiunneqanngilaq, taamaattumik Naalakkersuisuninngaanniit aalajangiuteriivittutut pillugu eqqartunngilarput, suli inatsisissatut siunniunneqanngimmat, Nivi Olsen oqarpoq.
Ilinniareernerullu kingorna taarsersuinermi sulinermut ilanngaat anginerussaaq, ilanngaalli anginerusoq iluaqutigissagaanni Danmarkimiiginnarnissaq piumasaqaatigineqassaaq.
Ilinniagaqartut Danmarkimi ilinniakkaminnik naammassinninnermik kingorna Nunatsinnut utertinniarnissaannut tamanna qanoq sunniuteqassanersoq maanna aamma misissorneqartoq, ilinniartitaanermut naalakkersuisoqarfimmiik oqarput.
Nivi Olsenili ernumanngilaq.
- Ilinniakkamik tunineqarsimalluni aningaasanik utertitseeqqilaarnermi taanna pisuulluni angerlanngitsoornissaat ernumassutiginngilara.
