Ilinniagaqarnersiutit nalikilliartuinnarput
Qaffasissumillu ilinniagaqartut peqatigiiffianni KISAQ-mi siulittaasup tulliata, Qarsoq Høegh-Dam-ip, ilinniagaqartut ajornartorsiutigisartagaat ilisimaarilluarnerarpai:
- Ilinniagaqarnersiuteqarneq 4500-mut inissisimasoq nikeriarsimanngitsoq, saniatigulli qiviassagaanni soorlu SIK-p akissarsiassaa annikinnerpaaffissaat ukiup ingerlanerani nikeriaqattaarsimalluni, Qarsoq Høegh-Dam oqarpoq, taassumalumi Nuummi Ilisimatusarfimmi kandidat-inngorniarluni ilinniagaqaleruttortup ulluinnarni aningaasartuutinut malinnaasinnaajumalluni ilinniaqaterpassuarmisulli saniatigut suliffeqartariaqarnerarpoq:
- Tapiissuteqarpunga 4500-mik, kisianni saniatigut sulisarpunga, soorlu taxartarlunga. Kisianni tassa sulisaraluarlunga fradrag-qannginneq taanna artornalaartarpoq ilinniarlunilu oqallititsiniarlunilu suliffeqarluni, Qarsoq Høegh-Dam oqarpoq, Nunatsinnilu ilinniagaqarnersiutit 2005-ip kingorna sooq qaffanneqarsimannginnersut Ilinniartitaanermut naalakkersusuugallartumut, Palle Christiansen-imut, apeqqutigigatsigu ima akivoq:
- Ilinniagaqarnermusiat aningaasanut inatsit aqqutigalugu ukiut tamarluinnaasa aningaasaliiffigisarpavut, inatsisartunillu tamarmiusunit ukiut tamaasa akuerineqartuartarsimalluni. Ilami inatsisartuni ilaasortat arlaannaalluunniit ilinniaqarnermusiat qaffaavigineqarnissaanut siunnersuuteqarnikuunngillat, ilinniartitaanermut naalakkersuisoq oqarpoq, inuusuttullu suli amerlanerusut ilinniaqalernissaat naalakkersuisunit pingaartinneqartutut oqaatigineqartuarmat ilinniagaqarnersiutit sooq aamma qaffariartortinneqartariaqarsimannginnersut apeqqutigigatsigu ima akivoq:
- Pissutsit taamaammata soorunami ugguarnaqaaq. Piviusulli imaapput: Amerlanernik ilinniagaqarsimasunik pisariaqartitsivugut, aningaasassalli aamma killeqarmata tulleriiaarisariaqartuartarluta. Ilinniartitaanermummi aningaasanik amerlanernik immikkoortitsinikuunngilagut, ilinniagaqarnersiutillu amerlinerussagutsigit arlaanniit aallertariaqassagatta suliniutit allat sunningaaneersuusinnaallutik. Tassa aningaasanik naammattusaariniaannavinnissaq sulinitsinni atugarisariaqartuartarparput, Palle Christiansen oqarpoq.
Qaffasissumik ilinniagaqartut peqatigiiffiat KISAQ Ilisimatusarfimmi ippassaq oqallitsitsimmat ilinniagaqarnersiutit qaffanneqarsimanngitsut kingunerinik ilinniagaqartut aningaasatigut artukkeriartuinnarneqarneri oqaluuserineqarput. Ilinniagaqartullumi ippassaq oqallisereermata KISA-p siulittaasuata tulliata Qarsoq Høegh-Dam-ip politikerertavut ima tinnersarpai:
- Tusarniarfigisigik. Pingaartumik peqatigiiffik KISAQ, massakkut avaqqunneqaqqissinnaanngilaq, qaqinneqareerpoq, Qarsoq Høegh-Dam, oqarpoq.
Ilinniagaqarnersiutit nalinginnaasut saniatigut ataasiarlutik 10.000 koruuninik atorsinnaatitaapput, semesterillu ataatsip ingerlanerani ataasiarlutik 6.000 koruuninik atorniarsinnaatitaallutik.
