Broberg: Ileqqaarinissaq isumaqatigiinniarnerni pingaartinneqassasut
2019-imut aningaasanut inatsisissatut siunnersuummik saqqummiussineq imminut nappattumik aningaasaqalernissamik kissaateqarnermik ilisarnaateqarpoq.
Aningaasanut inatsit sinneqartoorfiuvoq, Pele Brobergilu politikkikkut iliuusissat pillugit oqaluppallaanngilaq, pisortat aningaasartuutaannik aqutsinerunissamik, Namminersorlutik Oqartussat ileqqaagaqarnissaannik namminersorlutillu inuussutissarsiortut kaaviiaartitaqarnerulernissaannik oqaluuserinninnerulluni.
Pele Brobergip siunnersuutini Inatsisartunut saqqummiutereeruniuk, akueritinniarlugu partiinut isumaqatigiinniutigissavaa.
Tamannali ajornakusoorsinnaavoq. Tassami partiit iliuusissanik nutaanik kissaateqartaqimmata aningaasanut inatsisissaq ukiami isumaqatigiinniarnerni killissaa tikillugu aningaasartuutissanik ilaartorneqartarpoq.
Broberg: Partiit aningaasalersuinissamut tikkuussisariaqartut
Pele Brobergilli partiinut isumaqatigiinnialertigani oqaasii ersaripput:
Isumaqatigiinniarnissanimi Nunatta Karsiata qanoq ililluni amerlanerusunik aningaasaateqarnerulernissaa amerlanerusunillu ileqqaaruteqarsinnaaneq pingaarnertut qulequtaassapput.
AAMMA ATUARUK Aningaasanut inatsisissatut siunnersuut sinneqartooruteqarfiusussaq
Partiillu iliuusissanik nutaanik kissaateqarunik, tamakkua qanoq aningaasalersornissaannut tikkuussisariaqarput.
Pele Brobergip aamma 2020-mut aningaasanut inatsisissatut siunnersuut aatsaat aappaagu saqqummiunneqartussaq oqaluuseraa. Naalakkersuisut aningaasanut inatsisinik allamik ilusilimmik aappaagu aningaasanut inatsisissamut isumaqatigiinniarnermit suliaqartalerniarput. Tassalu aningaasartuutit inuiaqatigiinnut pingaarutilinnut kissaatigisanullu agguataarneqartalissapput.
Taavalu Danmarkimiit ataatsimut tapiissutinik qanoq pisariaqartitsiunnaariartorsinnaanersugut ukkatarineqassaaq.
Naalakkersuisut imminut nappannerusumik aningaasaqarnissamik anguniakkamik saniatigut, aaqqissuusseqqittoqanngippat pisortat isertitaat aningaasartuutaanninngaanniit amerlaneruleriartorlutik aningaasassaarukkaluttuinnarneq eqqarsaatigisariaqarpaat.
Tamannalu pillugu aningaasanut inatsisissatut siunnersuummi ima allassimasoqarpoq.
- Pisortat aningaasartuutaat 2021-mi tamatumalu kingorna isertitanit amerlanerujartuinnassasut siunissami pisussanik takussutissiat nutaat takutippaat.
2030-mi missingersuut oqimaaqatigiittassappat milliardit koruunit amigaatigineqassasoq, siusinnerusukkut naatsorsuutigineqarsimasoq, Pele Brobergip tusagassiortunik katersortitsinermi eqqaasitsissutigaa.
Amigaatigineqartussalli ikilinnerunissaannik, tassalu 500 millionit koruuniunissaannik, naatsorsuutigineqalersimapput, tamannalu ataani takuneqarsinnaavoq:
AAMMA ATUARUK Sulinermut ilanngaat 2020-utinnagu atuutilersinneqarsinnaanngilaq