Inatsisartut qimakkaat Ilaasortat uku qinigassanngorteqqinngillat
Inatsisartuni ilaasortaaffiit piumaneqaqisut kikkunnik inuttaqalissanersut sapaatit akunneri pingasut qaangiuppata aalajangerneqassaaq. Politikerilli arlallit qinersinerup kingorna Inatsisartunut uteqqinnginnissaat maanna paasinarsereerpoq.
Qinigassanngortittullu allattorsimaffiini saqqummiunneqaqqammersuni pingaartumik Siumumi ilaasortaasut politikkimik suliaqarunnaartussanngornerat paasinarsivoq.
Siumukkormiut sisamat, Lars-Emil Johansen, Martha Lund Olsen, Jens-Erik Kierkegaard aamma Suka K. Frederiksen apriilip 24-ani qinersisoqalerpat qinersinermi allaffissami nassaassaassanngillat.
Qinersinissaq Inatsisartuni akuersissutigineqarmat politikeritoqqap Lars-Emil Johansenip oqaatigaa politikkimik suliaqarunnaarnissani killitsinnartoq, aammali ilerasuutissartaqanngitsoq.
- Isumaqarpunga politikkikkut suliaqarninni ajunngivissunik ima amerlatigisunik angusaqarlusimallunga piffissami aggersumi iluarisimaarlunga kingumut qiviartarsinnaassallugit, Lars-Emil Johansen oqarpoq.
Parteeqataata Jens-Erik Kirkegaardip Inatsisartuni sulinini aamma qimappaa, taamatullu aalajangernera ajornanngitsuaraasimavoq.
- Ilaqutariittut inuunerup nunalu tamakkerlugu politikeritut sulinerup ataatsikkoortinniarnissaat ajornakusoorsimavoq, Jens-Erik Kirkegaard taama oqarpoq.
Jens-Erik Kirkegaardilu ilaquttani pillugit unittoq, Martha Lund Olsen suliatigut soqutigisani pissutigalugit siorna septembarip qaammataani politikkikkut suliaqarnini unitsippaa, Kommuneqarfik Sermersuumi isumaginninnermut pisortanngorami. Taamani ima oqarpoq:
- Inersimasuunerma annerpaartaa isumaginninnerup iluani sulisutut sulinikuuvunga. Taava qinikkatut sulilernikuuvunga 13-minngaanniit. Taamaattumik isumaqarpunga uannut eqqumiiginanngilaq sulileqqinnissaq politikeriujunnaarlunga, Martha Lund Olsen taama oqarpoq.
Nunatsinni namminiilivinnissamut naalakkersuisut siullersaat, Suka K. Frederiksen, qinigassanngorteqqinnissaminut arlalinnit kajumissaarneqarsimagaluarpoq, qinigassanngorteqqinniaranili Facebookikkut marsip ulluisa arfineq-aappaanni nalunaarutigaa qinersisartuminullu qujassuteqarluni.
Siumukkormiut sisamaasut saniatigut aamma Inuit Ataqatigiinneersoq Aaja Chemnitz Larsen qinigassanngorteqqinngilaq. Taassuma oqaatigaa taamatut aalajangernini oqitsuinnaasimanngitsoq Folketingimili ilaasortaanini salliutittariaqarlugu.
- Inuit Ataqatigiit sinnerlugit Folketingimi ilaasortaaffinni nukissakka atorniassagakkit qinigassanngortissananga aalajangernera oqitsuinnaasimanngilaq, Aaja Chemnitz Larsen taama oqarpoq.
