Per Rosing-Petersen Politikkikkut kisimiikkunnaartoq

Inatsisartunullu ilaasortaq killilersugaavallaanngitsumik namminerlu isummersortarnerminut naapertuuttumik tunuliaquteqalerluni, KNR-imut oqarpoq.

- Politikkikkut suleqqinniarninni toqqammavissaqalerpunga, partiimik tunuliaqutissaqalerlunga. Taannalu pingaruteqartorujussuuvoq, massakkut politikkikkut suleriaaserput qiviarutsigu, taamannak tunngaveqartarnissaq pisariaqartorujussuulluni, Partii Inuinni siulittaasunngoqqammersoq Per Rosing-Petersen taama oqarpoq.

AAMMA ATUARUK Partii Inuit inatsisartunut isertitaqarnissaa qularnarpoq

Inatsisartunullu ilaasortaq taamaalilluni Inatsisartuni attaviitsuujunnaarpoq.

Kisianni immikkut ittumik ataatsimeersuarnermi ilaasortat politikkikkut anguniagassanik aalajangersaanngillat.
Upernaaru marsimi apriilimiluunniit aatsaat aalajangersaassapput. Partiimilli tunuliaquteqalerneq Per Rosing-Petersenimut pingaartuuvoq.

- Uannut pingaruteqarluinnaqqinnaarsimavoq, imannak killilersorneqarpallaanngitsumik uanga isummersortarninnut naapertuunerusumik suleqateqarnissara, Per Rosing-Petersen oqarpoq.

AAMMA ATUARUK Per Rosing-Petersen sammenligner grønlandske forhold med apartheid

Partii Inuit Inatsisartuniileqqinnerminni naalakkersuisoqatigiinnut illuatungiliunnatilluunniit tunuliaqutsersuissangitsut, siulittaasoq oqarpoq, suliat ataasiakkaat apeqqutaatillugit parteertik isummertassasoq oqarluni.

Partiilli Naalakkersuisuutitaqartut tamarmik saamerlerneersuunerat isumalluarnartippaa.

- Sualummik inuiaqatigiit iluanni assigiinngitsut equnganerit - pissakitsut amerlavallaarujussuarneri, tassuunartaatigut qularnanngitsumik suleqatigiissuteqarsinnaassaagut. Taakkua timitaliisinnaassuseqarnerat tassunga atatillugu aamma soorunami apeqqutaasorujussuuvoq.

Per Rosing Petersen Siumumi kingusinnerusukkullu Partii Naleqqami ilaasortaavoq. Taassumalu siulittaasutut tullersortigilerpai siullertut Paaliit Mølgaard, aappaatullu Aannguaq Poulsen.

AAMMA ATUARUK Per Rosing Petersen Partii Naleqqamit ilaasortaajunnaarsinneqartoq