Partii Inuit inatsisartunut isertitaqarnissaa qularnarpoq

Partii Inuit inatsisartunut isertitaqarnissaannut qularnartoqarpoq. Isumasiusitsinerit arlaqartut takutippaat partii ilungersortariaqartoq. Qinersisartunik isumasiutsinermi, misissuisitsisarfimmi Epinionimi ullumi saqqumminneqartumi Partii Inuit qinersisartut 2 procentiannik tapersersorneqarpoq
Formanden for Partii Inuit Nikku Olsen
Allattoq Jaaku Lyberth
novembarip 19-at 2014 17:44

Partiimi siulittaasup Nikku Olsenip qinersisartunik isumasiusitsinerup inerneri ataqqivai tusaatissatullu tigullugit.
Isumasiusitsinermi Partii Inuit tapersersorneqarpallaannginneranut patsisaasoq imatut nassiuarpaa.

- Partii Naleraq suliniuteqangaatsiarpoq soorunalimi, partiip nutaajunera  ukkatigalugulu  partiinit allanit  qinersisartunik tigooraasuunera pissusissamisuuginnartutut uanga isigaara, Nikku Olsen oqarpoq.

Inatsisartunut qinersinermi kingullermi Partii Inuit qinersisartut 6,5 procentiannik qinerneqarpoq.
Inunnik isumasiusitsisarfiup Epinionip qinersisartunik misissuitsinerani Partii Inuit qinersisartut 2 procentiannit taamaallaat tapersersorneqarpoq.
Inatsisartunik qinersineq sioqqullugu partii inatsisartunut qinigaatitaqarnissaanut iliuusissat Partii Inuit siulittaasuata ima oqaatigaa.

 

Epinionip isumasiuinera pillugu paasissutissat

  • Isumasiuineq Nunatsinni innuttaasut 731-t nalaatsornerinnakkut toqqakkat apersorneqarnerinik toqqammaveqarpoq.
  • Paasissutissanik katersuineq piffissami novembarip arfernanit 17-ianut ingerlanneqarpoq. Apersuisut marluinnik oqaaseqartuupput apersorneqartullu kalaallisut danskisulluunniit akissuteqarnissaminnut periarfissinneqarlutik. Apersorneqartut 87 %-ii kalaallisut akissuteqarput 13 %-illu danskisut akillutik.
  • Oqarasuaatit normui atorneqartut TelePostimit pissarsiarineqarput, tassaallutillu oqarasuaatit nalinginnaasut, angallattakkat aammalu Tusassillit normui.
  • Kisitsisitigut paasissutissat nangaanartoqassusiat  annerpaamik +/- 3,6 procentiuvoq.

- Piffissaq suli atunngilarput partiit siuttuisa oqalliffigisaat, aamma partiit ataasiakkaarlutik siuttuisa politikkikkut anguniagaasa tusagassiuutini sammineqarnerat suli pinngilaq, taamaattumik tupinnarpallaanngilaq taamatut inerniliisoqassappat, taakkua sammereerutsigit  qinersisartut isumaasa allanngornissaat naatsorsuutigilluinnarpara.
Partii Inuit siulittaasuat Nikku Olsen taama oqarpoq.
Partii Siumup siulittaasua Kim Kielsen  radioaviisimit oqaloqatiniarneqaraluarpoq ullumili tamanna ilutsissinnaasimanngilaq.  

 

 

 

Nutaarsiassami kukkunermik nassaarsimaguit uunga allaffigineqarsinnaavugut.

Aamma atuaruk