Unammisartut arnartaat piariilersut
Nunanut allanut unammisartut arnatai Island Games 2017-imi juunip 25-ani aallartittussamut peqataanissaminnut piareerluinnalerput. Bent Petersen aamma Knud Egede sungiusaasuupput.
Gotlandilli tungaanut aallannginnerminni arsaattartoqatigiit marluk unammissavaat. Tassa 19-ani Skjold Birkerød, Birkerødimeersut sungiusaatigalugu unammissavaat. Ullullu marluk qaangiuppata Allerød unammissallugit.
Taakkunani kalaallit arsaqatigiittut unammisinnaanissaat sungiusarneqassasoq, Knud Egede ilisimatitsivoq.
Unammisartut Gotlandimut kingorna aallassapput, Island Gamesimilu unammisaqattaarnerit aallarnerlugit juunip 25-ani Gotlandermiut unammissallugit.
- Island Gamesimi angusarissaarnissarput siunertaraarput, pissartanngorniutivinnernullu anngunnissarput siunertaralugu. Soorunami ujaminnanniarsarissaagut, Knud Egede KNR-imut oqarpoq.
AAMMA ATUARUK GIF kræver flere medaljer ved næste års Island Games
Unammisartut nuannaartut
Nunanut allanut unammisartut Nunatsinni pissartanngorniuunnerni unammisartakkatik arsaqatiginissaat qilanaaraat.
- Unammisartut tamarmiullutik suli ataatsimuunngillat. Facebookikkulli naapittarfitsinni attaveqatigiilluarput, nuannariinnerallu takuneqarsinnaalluni. Unammisartut nutaat pissangapput, misilittagartuullu unammisartakkatik naapeqqinnissaat qilanaaraat, Knud Egede oqarpoq.
Nunatta isikkammik arsaallutik unammisartuisa angutitai arnartaallu Nunarput sinnerlugu Gotlandimi unammisaqattaassapput.
Island Games 2017-mi isikkammik arsaallutik unammisussat juunip 25-ani aallartittussat unammiffissaasa ullui uani takuneqarsinnaapput.
AAMMA ATUARUK Kalaallit ataasiinnarmik ujaminnapput
