Ikiaroornartunik anngiortumik eqqussuineq nakuusernerlu politiinut aningaasarsivimmi ulapitsitsisut

Arnaq 19-inik ukiulik ikiaroornartumik timiminiititaqarluni Kangerlussuup timmisartoqarfiani ippassaq tigusarineqarpoq. Nunatsinnut anngiortumik eqqunniarsarisaa qanoq angitiginersoq politiit suli ilisimanngilaat.

- Timianiittoq tamaat peernissaata tungaanut politiinit tigummigallarneqarpoq, taavalu eqqartuussivimmut ullumi sassartinneqassaaq. Tamatuma kingorna iperagaassaaq, Kalaallit Nunaanni Politiini pigaartut pisortaat Carl Svær oqarpoq.

Suliami nalorninartoqarpallaarmat, arnaq eqqartuussivimmut sassartinneqareeruni iperagaassasoq, pigaartut pisortaata paasissutissiissutigaa.

Politiit suliaq pillugu annerusumik maannakkut oqaaseqarsinnaanngillat.

Nakuuserneq sakkortunerusumik pineqaatissiiffiusoq

Politiit arnamut inuusuttumut suliap saniatigut aamma angummik 18-inik ukiulimmik tigummigallagaqarput. Taanna 17-inik ukiullit marluk peqatigalugit angummik 25-nik ukiulimmik saassussisimasutut pasineqarpoq.

17-inik ukiullit pasisaanerminnik paasitinneqareerlutik killisiorneqareerlutillu iperagaasut, pigaartut pisortaat paasissutissiivoq. Politiit pisariaqartitatik pissariarereerpatigit aamma 18-inik ukiulik iperagaassasoq, Carl Svær oqarpoq.

- Soorunami eqqartuussivitsigut suliassanngortinneqassapput. Peqatigiillutillu saassussineq uani suliami pineqarmat, sakkortunerusumik pineqaatissinneqarnissartik ilimagisinnaavaat, pigaartut pisortaat oqarpoq.

Saassunneqartoq annerusumik ajoqusersimannginnami nakorsamit misissorneqareerluni angerlarsinnaasimasoq, Carl Svær oqarpoq.