Ikiaroornartulerinermik suliarujussuaq Nunatta Eqqartuussisuuneqarfiani aalajangiiffigineqartoq
Eqqartuunneqartut ilaat ataaseq hashimik 10 kiilumit anginerusumik anngiortumik eqqussuinermik isumaginnittutut eqqartuunneqarluni ukiuni pingasuni pinerluuteqarsimasunut inissiisarfimmiittussanngortinneqarpoq 575.000 koruunillu tassannga arsaarinnissutigineqarlutik.
Hashimik nassinneqarsimasutut eqqartuunneqartut
Eqqartuunneqartullu allat marluk hashimik 5 kiilup missaanik anngiortumik eqqussueqataasimasutut eqqartuunneqarput, poortukkanik hashimik imalinnik nassiussanik tigusisuugamik.
Eqqartuunneqartut eqqartuussisoqarfimmi qajassuussinerusumik pineqaatissinneqaraluarput, Nunattali Eqqaartuussisuuneqarfiata aalajangiineratigut ukioq ataaseq sinnerlugu pineqaatissinneqarsimasunut inissiisarfimmiittussanngortinneqarput aningaasanillu arsaarneqarlutik. Politiit tusagassiorfinnut nalunaarummi taama allapput.
AAMMA ATUARUK Ilulissani hashimik tuniniaanermi arlallit pasineqartut
Inuit katillugit arfineq-marluk hashimik anngiortumik eqqussisimasutut Eqqartuussisoqarfik Sermersuumi 2016-imi decembarip aallaqqaataani eqqartuunneqarput, taakkulu ilaat pingasut Nunatta Eqqartuussisuuneqarfiani sapaatiummat eqqartuunneqarput, eqqartuussut taakkununnga atuuttoq Nunatta Eqqartuussisuuneqarfianut suliareqqitassanngortinneqarsimammat.
Nunatta Eqqartuussisuuneqarfiata eqqartuussutit sukannernerulersikkai
- Suliaq angisuupilussuuvoq, inuit katillugit aqqaneq-marluk maannakkut eqqartuunneqarsimalerput imaluunniit pillaatitut akiligassinneqarlutik. Ilaatigullu inuit allat marluk eqqartuussisoqarfimmi tamarmik immikkut ukiuni marlunni qaammatinilu qulingiluani pineqaatissinneqarsimasunut inissiisarfimmiittussanngortinneqarput, unnerluussisuuneq Zara Illum Petersen taama oqarpoq.
- Eqqartuussutit Nunatta Eqqartuussisuuneqarfianit sukannernerulersinneqarnerat nuannaarutigaarput, tamanna hashilerinerup qanoq akuerineqanngitsigineranik takutitsimmat - sutigulluunniit akuuffigisimagaluaraanni. Aamma poortukkamik hashimik imalimmik tigusisuuinnaraanniluunniit, tamanna anngiortumik eqqussinermut ilaalluinnartuuvoq sakkortuumillu pillagaassutaasarluni. Suliami matumani sivisuumik pineqaatissinneqarsimasunut inissiisarfimmiittussanngortitsinerit aamma takutippaat hashimik anngiortumik eqqussuineq akuerineqarsinnaanngilluinnartutut isigigipput, Nunatsinni Politiini unnerluussisuuneq Zara Petersen, Nunatta Eqqartuussisuuneqarfiani unnerluussisussaatitaasut sinnerlugit sassartuusoq taama oqarpoq.
AAMMA ATUARUK Hashimik nassiussisut paasineqanngitsoortartut
