Ice Cold Gold taamaatiinnarneqartoq
Aallakaatitassiornermi aqutsisoq David Casey qarasaasiami mailikkut nalunaarpoq, Ice Cold Goldip aallakaatitassiarineqaqqinnissaa Animal Planetimit taamaatiinnarneqartoq.
Piviusulersaarummik tv-kkut aallakaatitassiarineqartartumi tassani ukiuni tulleriinni pingasuni Amerikamiut kuultisiortartut Nunatsinni ujaqqanik erlinnartunik atortussiassanillu ujaasisut malinnaaffigineqartarput.
Pinngortitami assilisat kusanartorsuit saniatigut aallakaatitassiamik isiginnaartartorpassuit nunarsuarmi sumi tamaaniittut Kalaallit Nunaata inuinik nutaaliaasumik siunissamilu isumalluarnartoqarneranik paasitinneqartarput.
AAMMA ATUARUK Ice Cold Gold aavariartunut: Akornusersuivusi!
- Aallakaatitassiap Ice Cold Goldip ingerlateqqinneqarnissaa Animal Planetimit ajoraluartumik taamaatiinnarneqarpoq, taamaattumik aasaru Kalaallit Nunaaliaqqittussaajunnarpugut, David Casey mailikkut allappoq nangillunilu:
- Ukiuni pineqartuni Kalaallit Nunaanniittarnitsinni ilikkagaqarfigisimaqaasi. Kalaallit Nunaata inuunitsinni puigunngisaannagassatsinnik misigisaqartittarpaatigut, neriuutigaarpullu nunarsi pillugu oqaluttuanik amerlanerusunik oqaluttuarnissatsinnik periarfissinneqarumaarluta, David Casey allappoq.
Ice Cold Gold maani Nunatsinni oqallinnermik pilersitsisarpoq, ilaatigut Amerikamiorpalaarpallaartumik periaaseqarnerat oqallisigineqartarluni, tamatumali peqatigisaanik Kalaallit Nunaat nunarsuup ilaani ilisimaneqalersippaat nuannarineqalersillugulu.
