ICC: Nunatsinni sumiorpaluutigut tammatsaaliortariaqarpagut
- Oqaatsigut tammannginnissaat uagutsinnut pingaaruteqarpoq. Tammannginnissaannut tullissatsinnullu ingerlatinneqaqqinnissaannut suliniuteqartariaqarpugut.
Tukumminnguaq Nykjær Olsen KNR-imut taama oqarpoq. Taanna ICC Kalaallit Nunaanni allaffimmi pilersaarusiornermilu pisortaavoq.
Kalaallit Nunaanniittut nunanilu issittoqarfiusuneersut soorlu Canadameersut, Alaskameersut Ruslandimeersullu sullitaralugit ICC kattuffiuvoq.
Nunat Peqatigiit 2022-miit 2032-mut nunat inoqqaavisa ukiorissagaat aalajangiipput.
Assi: Tukumminnguaq Nykjær Olsen.
Tukumminnguaq Nykjær Olsen peqataaffigisaanik Naalagaaffiit Peqatigiit ataatsimiisitseqqammerpoq. Tukumminguaq Naalagaffiit Peqatigiit aningaasaateqarfiata siulersuisuni issittormiut sinnerlugit ilaasortaavoq.
Issittumi nunap inoqqaavi sinnerlugit tassani ilaasortaavoq, Nalagaaffiit Peqatigiillu qullersaannut siunnersueqataasassalluni.
Nunani tamalaani inoqqaat peqatigiiffiillu sinniisaannik Naalagaaffit Peqatigiit inoqqaanut ataatsimiisitsinerni assigiinngitsuni peqataatitsinissamut aningaasaateqarfik ilaatigut tapiissuteqartarpoq.
Tunumiut oqaasii tammatsaaliorneqassasut
Ilaatigut Naalagaaffiit Peqatigiit inoqqaanut ataatsimeersuartitsinerat peqataaffigineqarsinnaavoq. Tukumminnguaq Nykjær Olsenilu tassanerpiaq ataatsimeersuaqataavoq.
- Nunat inoqqaavisa oqaasii massakkut inissisimanerat imaakkamik, oqaatsit annertuumik atulerneqannginnerini nungukkiartuaarput. Taavalu nunasiaatiginnittuusut oqaasiisa atorneqarnerjussuisa kingunerinik. Taasuma saniatigut kulturi peqataatinneqannginneranik. Taava tassa anguniagaavoq nunat inoqqaavisa oqaasii uumarissarneqarnissaat nukittorsarneqarnissaalu. Kulturiat pisinnaatitaaffiillu malillugit, taanna KNR-imut oqarpoq.
Nunatsinni sumiorpaluutit illersorneqarnerusariaqartut taassuma erseqqissaatigaa.
- Uagut ICC-minngaaniit pingaartissimavarput kulturerput amma oqaatsivut nungukkiartuinnassanngippata pigiinarnissaanut suliniuteqartariaqaratta. Assersuutigalugu angalanitsinni paasivarput Tasiilami naalagiarneq tunumiusut ingerlanneqarsinnaanngitsorluunniit.
AAMMA ATUARUK Tukumminguaq Naalagaffiit Peqatigiit aningaasaateqarfiata siulersuisuni issittormiut sinnerlugit ilaasortanngortoq
- Kitaamiusut ingerlanneqartarpoq. Taava taakku pingaartumik sumiorpaluutit annertunerit ilanngullugit aamma Qaanaarmiut oqaasii ukkataritinneqarnissaat pingaartipparput, allanilluni aamma dialektinik suliassaqarpat aamma taakku tigorusuppagut ingerlakkusuppagullu.
Tunumiut oqaasii atorlugit naalagiartalernissaq ICC-mit anguniarneqarpa?
- Ilaatigut aap, aamma ilaatigut ilagivaa atuartitsinermi namminerisaminnik tunumiut oqaatsitsik atorsinnaanerunissaat. Tusarparput tappavaniikkatta meeqqat timimut atsersueriaasitik nammineq puigoriarttulersimagaat, kitaamiut oqaasii atorneqarneratigut. Taanalu isornartorujussuartut isigivarput, Tukumminnguaq Nykjær Olsen oqarpoq.
