Tukumminguaq Naalagaffiit Peqatigiit aningaasaateqarfiata siulersuisuni issittormiut sinnerlugit ilaasortanngortoq
Tukumminnguaq Olsen Naalagaaffiit Peqatigiit nunat inoqqaavinut aningaasaateqarfianni siulersuisuni ilaasortanngorpoq.
Tukumminnguaq Issittumi nunap inoqqaavi sinnerlugit ilaasortanngorpoq, Nalagaaffiit Peqatigiillu qullersaannut siunnersueqataasassalluni.
Nunap inoqqaavinut aningaasaateqarfimmi siulersuisuni ilaasortat tallimat nunarsuup ilaani sumiiffinni assigiinngitsuninngaaneersuupput. Taakkunannga sisamat sinnerini ataaseq Den Demokratiske Republik Congomeersuuvoq, ataaseq Canadameersuuvoq, ataaseq Nepalimeersuuvoq ataaserlu Belizemeersuulluni.
- Nuannaarpunga tanngassimaarlungalu taama tatigineqarlunga Naalagaaffiit Peqatigiit nunat inoqqaavinut pisinnaatitsissutiini sisamaasuni naggueqatigiit Inunniit ilaasortaqalermat, qilanaarpungalu siulersuisuni suliat aallartinnissaannut, Tukuminnguaq Olsen tusagassiuutinut nalunaarpoq.
Tukumminguaq Inuit Issittormiut Siunnersuisoqatigiiffiata ICC-p allattoqarfiani ulluinnarni aqutsisuuvoq. Issittumilu nunat inoqqaavinut siunnersortaalluni. Aningaasaateqarfiup siulersuisuini ilaasortaaneq ukiunik pingasunik sivisussuseqartarpoq.
Naalagaaffiit Peqatigiit nunat inoqqaavinut aningaasaateqarfiat 1982-imi pilersinneqarpoq.
