ICC-ip siulittaasua 65-inik ukioqalerpoq
Ullumikkut Aqqaluk Lynge 65-inik ukioqalerpoq, 1947-mi Aasianni inunngorpoq. Inuit Ataqatigiit sinnerlugu Inatsisartuni ilaasortaasimavoq, Inuit Circumpolar Council-imik pilersitseqataalluni, massakkullu ICC-imi siulittaasutut inissisimalluni.
Atuakkiortuuvoq, politikeri, oqallisaarisartorlu. Kalaallit Nunaanni issittumilu nunat inoqqaavinut sullissineq ukiorpassuarni aallutaraa. Politikkikkut saamerlerni maluginiarnartumik suliaqarsimavoq, Inuit Ataqatigiit pilersinneqarneranut peqataalluni. Saniatigut Aasivik pilersinneqalermat aamma peqataavoq.
Ukioq manna Aqqaluk Lynge USA-mi naalagaaffimmi, New Hampshire-imi, Universitetimi, Dartmouth College-imi, ataqqinaammik doktorinngortitaavoq. Universitetimi rektorip Jim Yong Kim inuit pisinnaatitaaffiinut illersuiniarluni suliniutai nersorlugit Nelson Mandela aamma Martin Luther King-imut assersuuppaa.
