IAp qineqqusaartitaa: Suliffiup nalaani pujortarnasi

Nunatsinnimi inersimasut 66 procentii pujortartarput, Juliane Henningsenilu isumaqarpoq amerlavallaartut.

- Nunatsinni pujortartartut siunissami ikinnerujussuanngortinneqartariaqarput, innuttaasullu peqqinnerulertariaqarlutik, Juliane Henningsen tusagassiuutinut nalunaarummini ilaatigut taama allappoq, nunallu allat pujortarfiujunnaavinnissamik siunniussaqartut innersuussutigalugit, soorlu New Zealandimi 2025-nngortinnagu pujortartartuerutivinnissaanik siunniussineq assersuutigalugu:

- Nunarput peqqiffiusoq ukiut 25-t qaangiuppata qanoq isikkoqassanersoq isummerfigereertariaqarparput, Juliane Henningsen taama allappoq, pujortartarnermullu inatsisip sukateqqinneqarnissaa pisariaqarsoralugu. Taannami isumaqarpoq silami inuit aqqusaartagaanni tamani, soorlu bussit unittarfiini, pisiniarfiit silataanni, timmisartoqarfiit silataanni assigisaannilu pujortartarnerup inerteqqutaalernissaa kissaatiginartuusoq.

Taannaannaanngilarli. Tassami pisortat suliffeqarfiini tamani suliffiup nalaani pujortartoqanngilluinnarnissaa siunnersuutigaa, taamatullu siunnersuutini Inatsisartunngortussat isummerfigissagaat siunniussimanerarlugu.