IA: Siunersiuinermi apeqqutit akineqanngitsut amerlanerusut

Soraarnerusutisiaqarnissamut aaqqissuussaq inuppassuarnik eqquisoq, piaartumik iliuuseqarfigineqartariaqartoq, Inuit Ataqatigiineersoq, Múte Bourup Egede isumaqarpoq.
Siunersiuinermi apeqqutit akineqarsinnaanngitsut, allakkatigut akissuteqarfigineqassasut, Aningaasaqarnermut naalakkersuisoq neriorsuivoq. Tamannalu piaartumik suliarineqartariaqartoq Muté B. Egede isumaqarpoq. Assi © : KNR
januaarip 28-at 2020 16:18

Siunersiuinermi apeqqutit akineqanngitsut amerlanerusut, Inuit Ataqatigiit siulittaasuat, Aningaasaqarnermut Akileraartarnermullu Ataatsimiititaliami ilaasortaq, Muté B, Egede (IA) isumaqarpoq. Soraarnerussutisiaqarnissamut pinngitsoorani aaqqissuussineq pillugu inuit eqqugaasut paasissutissinneqartariaqartut partiip siulittaasua isumaqarpoq.

- Inuit Ataqatiginninngaaniit salliutipparput aamma pingaarnerpaatipparput innuttaasut eqqorneqartut, siunertaanngitsumillu eqqorneqalersut piaartumik aaqqiivigineqarnissaat, Muté B. Egede oqarpoq.

Soraarnerussutisiaqalernissamut aaqqissuussamut peqataasussaatitaanermut inatsit 2018-imi atuutilermalli akiliisimanngitsut ukioq manna aallartittumik eqqugaapput. Tassami annertunersumik akileraartinneqalerput. Uanili paasititsiniaaneq naammassimanngitsoq isornartorsiuisut isumaqarput.

AAMMA ATUARUK Soraarnerussutisiaqalernissamut piumasaqaatit pillugit ajornartorsiutit amerlanerusut

Muté Bourup Egedep isumasiuinermi peqataasup naliliinera naapertorlugu, naalakkersuisup apeqqutinut akissutai naammaginanngillat. Tassami apeqqutit tamakkerlugit akineqanngillat. Tassalu innuattaasut paatsungasut tamakkiisumik akissutissarsinngitut, Muté B. Egede isumaqarpoq.

- Siunersiuinermi erserpoq apeqqutit qitiulluinnartut naalakkersuisuminngaanniit suli akineqarsinnaanngitsut.

Assersuutigalugu eqqaavaa, inatsilerituuniit allagaateqartoq, ataatsimiititaliamut tamanulluunniit saqqummiunneqanngitsumik. Taannalu apeqqutink pilersitsisoq.

Allagaat taanna qitiusunik imaqarsinaasoq, Múte Bourup Egede oqarpoq.

Siunersiuinermi apeqqutit akineqarsinnaanngitsut, allakkatigut akissuteqarfigineqassasut, Aningaasaqarnermut naalakkersuisoq neriorsuivoq.

AAMMA ATUARUK Ataatsimiititaliami siulittaasoq: Ammasumik siunersiuineq iluatsilluarpoq

Tamannalu piaartumik suliarineqartariaqartoq Muté B. Egede isumaqarpoq.

- Suliap ingerlariaqqinnissaanut pisariaqartilluinnakkatsinnik suli amigaateqarpugut. Taamaammat sapinngisarput tamaat apeqqutinik akiniaraluartoq, maannamut naammagisimaanngilagut.

Ataatsimiititaliamili ilaasortaaqataata, siulittaasup, Hermann Berthelsenip (S) eqqissisimasumik tiguaa.

- Naalakkersuisut soorunami periarfissaqartariaqarput assigiinngitsunik. Immikkoortut assigiinngitsut misissuiffigeqqaarlugit akisussaasumik, kingusinnerusukkut aatsaat saqqummiisoqarsinnaanera. Isumaqarpunga taanna allaanerusinnaanngitsoq.