Ataatsimiititaliami siulittaasoq: Ammasumik siunersiuineq iluatsilluarpoq
Taassuma Aningaasaqarnermut akileraartarnermullu nalakkersuisup akissutai naammagisimaarpai.
- Isumaqarpunga nassuiaatigineqartut assigiinngitsut paasinartorujussuusut, Hermann Berthelsen oqarpoq.
Taassuma akissutit saniatigut aamma periuseq nutaaq atuligartik iluarisimaarpaa.
- Kisiannili uagut ataatsimiititaliarput aatsaat siullerpaamik ammasumik ingerlatsinera ajunngilluinnartumik nalilerusuppara.
AAMMA ATUARUK Naalakkersuinermi malinnaasoq: Isumasioqatigiinneq pinngitsoornani pingaaruteqassaaq
Taanna ataatsimiititaliami siulittaasutut, soraarnerussutisiassanik katersinermut tunngasunik kukkuluttortoqarsimanera pillugu ammasumik siunersiuinermut aningaasaqarnermut naalakkersuisumut Vittus Qujaukitsumut aggersaasuuvoq.
Suliaq naatsumik
- Innuttaasut 6.828-t soraarnerusutisiaqarnissamut aaqqissuussinermut peqataasussaatitaanermut akiliisarsimanngillat. Taamammat Akileraartarnermut Aqutsisoqarfik aningaasanik amigaataasunik akiliisitsiniarpoq.
- Tassa imaappoq innuttaasut 6.628-t inatsit malillugu soraarnerusutisiassanut nammineq katersisussaatitaanermut akiliiniassammata taakku ukioq manna akileraaruteqarnerusariaqarput.
- Innuttaasut qanoq aningaasarsiaqartiginerat apeqqutaalluni 2 procentip 6 procentillu akornanni akileraarnerutinneqassapput.
- Soraarnerusutisiaqalernissamut aaqqissuussamut peqataasussaatitaaneq januaarip aallaqqaataat, 2018-imi atuutilerpoq, Namminersorlutik Oqartussalli Akileraartarnermut Aqutsisoqarfillu akileraarutip procentiata qaffanneratigut soraarnerussutisiassanut aatsaat ukioq manna akiliisitsipput.
Tigusiffik: KNR
Siunersiuinermi naalakkersuisup apeqqutit 41-t akunnerit marluk affallu ingerlanerani akissuteqarfigai.
AAMMA ATUARUK Soraarnerussutissanut katersineq pillugu ammasumik siunersiuineq: Kusanaatsuliaq! Naamik ajunaarnersuaq!
Innuttaasut soraarnerussutisiaqarnissamut pinngitsoorani aaqqissuussinermi peqarnissaannut tunngasunik Akileraartarnermut Aqutsisoqarfimmut sianerlutik paasiniaagaangamik ersarissumik akineqarsinnaasarsimannginnerat, Inuit Ataqatigiinneersup, Muté Bourup Egedep mamianartutut taavaa. Tassungalu Jens Napaattooq akuliuppoq, taannali isumaqarpoq mamianaannarani ajunaarnersuartut taaneqarsinnaasoq.
Vittus Qujaukitsulli apeqqutit tamaasa akisinnaanngilai. Assersuutigalugu Inatsimmi pingaarnertut imarisat tunngavissiisutut malinneqartutullu Naalakkersuisunut isigineqarnersut, aperineqarami akisinnaannginnamiuk eqqartuussissuserisumit misissorneqareerpat allakkatigut akineqarsinnaalerumaartoq neriorsuutigaa.
AAMMA ATUARUK Soraarnerussutissanut katersineq pillugu ammasumik siunersiuineq: Kusanaatsuliaq! Naamik ajunaarnersuaq!
Tamanna Hermann Berthelsenip pissusissamisoorsoraa.
- Tassa allatut ajornaqaaq taamaattoqartarpoq. Apeqqutit ilai ingerlaannaq akineqarsinnaanngillat, aamma piareersagassarujussuusaramik taamaammat taanna aamma naammagittarluta tiguarput. Utaqqissavagut taakku saqqummiussassai.
Ataatsimiititaliat allat ammasumik siunersiusinnaalernissaannut ilinniutaanissaa Hermann Berthelsenip neriuutigaa.
- Soorunami assigiinngissutigut ilinniarfigissavarput, tassanilu ataatsimiititaliat aamma allat ilimanarpoq aamma taamaaliorsinnaanissaminnut eqqarsaasersorsinnaalissasut, Aningaasaqarnermut Akileraartarnermullu Ataatsimiititaliami siulittaasoq, Hermann Berthelsen oqarpoq.
