Aalisarnermut politikki IA Siumumit taperserneqanngilaq
Saqqummiunneqartut KNAPK-mit sulisitsisullu peqatigiiffiannit GE-mit iluarisimaarneqarput,
taamaattorli raajartassat ukiunut tallimanut agguaanneqartarnissaannut isuma Siumumit aalaajangiusimaneqarpoq.
Raajartassat piffissaligaanngitsumik pisassiissutigineqartartut ukiunut 15-nut allanngortinneqarnissaat Inuit Ataqatigiinnit siunnersuutigineqarpoq.
AAMMA ATUARUK Aalisarnermut inatsit mittarfiillu kinguartinneqartussanngortut
Aalisarnermut inatsimmi pisassiissutigineqartartut ukiuni talllimani atuuttussanngortinnneqarnissaat qinersineq sioqqullugu naalakkersuisoqatigiit suliaraat. Tamannalu Siumumi aalajangiusimaneqarpoq.
- Siumumi tunngaviusumik politikkia allannguuteqanngilaq, pisassat ukiuni tallimani atuuttarnissaat Siumumi aalajangiusimaneqarpoq, Karl Kristian Kruse Siumut taama oqarpoq.
Pisassiissutit ukiut 15-it qaangiukkaangata utertinneqartarnissaanik IA-p siunnersuutaa tapersersorneqassapppat, maannakkut pisassiissutigineqartartut tassalu avataasiortut 57 procentinik sinerisallu qanittuani 43 procentinik raajartassinneqartarnerat allanngortinneqassanngilaq.
Apeqqummulli tassunga Siumut siusinnerusukkut siunnersuutigisartik aalajangiusimavaat.
- Raajartassat maannakkut avataasiortunut 57 procentinik sinerissallu qanittuani raajarniartartunut 43 procentinik pissassiisarneq, aalisarnermut inatsisip allannguutissaatut siunnersuummi, avataasiortut 50 procentinik sinerissallu qanittuani 50 procentinik pisassinneqartarnissaannik siunnersuut, Siumumit aalajangiusimaneqarpoq, Karl Kristian Kruse oqarpoq.
Naalakkersuisoqataasimasuni aalisarnermut politikkissaq tapersersorneqassanersoq itigartinneqassanersorluunniit suli isummerfigineqanngilaq.
- Aalisarnermut inatsisissap eqqartorluarneqarnissaa qilanaarivarput. Inuit Atatigiinnit siunnersuutigineqartoq, iluamik pulaffiginikuunngilarput, aamma partii oqaloqatiginikuunngilarput, taamaammat qilanaarisorujussuuarput KNR-ikkut arfininngorpat eqqartorneqalerpat, demokraatit aalisarnermut politikkisssaminnik saqqumiussinissaat Demokraatit siulittaasuat Randi Vestergaard Evaldsen taama oqarpoq.
Partiip Suleqatigiissitsisut pissassiissutit qanoq agguarneqarnissaat oqallinnermi matumani pingarnerpaasoraat.
- Maannakkut aalisagartassiissutit qanoq agguataarneqarnissaat isumaqatigiissutiginngikkutsigu ukiut 15-it qaangiuppata aalisagartassiissutit qanoq agguatarneqassanersut assortuussutigalugu isumaqatigiissuteqanngitsoorsinnaavugut, Michael Rosing Suleqatigiissitsisuni siulitaasoq oqarpoq,