IA Siumullu suli isumaqatigiinngillat

Naalakkersuisut siulittaasuata Kuupik Kleistip Inatsisartut ukiaanerani ataatsimiinnissaannut atatillugu ammaanersiornermi oqalugiaataa, Siumup siulittaasuanit Aleqa Hammondimit isornartorsiorneqarpoq, isorliunerusut sumiginnarneqarsimanerat, suliffissaaleqinerullu sukumiinerusumik iliuuseqarfigineqannginnera ilaatigut oqariartuutaalluni:

- Naalakkersuisoqatigiit ukua inissinnerata kingorna isorliunerusut nunaqarfimmiullu misigisimapput tusaaneqaratik, ineriartortitsinissamullu peqataatinneqaratik, Aleqa Hammond oqarpoq.

Siumup siulittaasua Aleqa Hammond taama oqarpoq.

Isorliunerusulli pillugit naalakkersuisut tungaanniit iliuuseqartoqalersaartoq, Inuit Ataqatigiit politikkikkut oqaaseqartartuata Aqqaluaq B. Egedep oqaatigaa, misissuinerni ilisimalikkat aallaavigalugit iliuuseqartoqarnerarlugu:

- Isorliunerusut annertuumik tassani pineqarput. Inuiaqatigiit naligiinnerusumik atugaqalernissaat ilaatigut taaneqarpoq, inuiaqatigit naligiinnerusumik atugaqalernissaat anguniarlugu aqqutit suut isummerfigisariaqarnerivut, suullu allanngortittariaqarnerivut ilaatigut iserfigineqarlutik, Aqqaluaq B. Egede oqarpoq, nangillunilu:

- Kisianni oqariartuut annerpaaq Inatsisartunut apeqqutaagunarpoq, tassaavorlu sutigut suleqatigiinnikkut aaqqissuusseqatigiissinnaavagut? Aamma qanoq iliorluta inuiaqatigiit pitsaanerusumik atugaqartut pilersissinnaavagut? Taavalu aamma suliffissat nutaat qanoq iliorluta aaqqikkusuppavut, Inuit Ataqatigiinninngaanniit oqaatigivarput, IA-p politikikkut oqaaseqartartua Aqqaluaq B. Egede taama oqarpoq.

Nunatsinni suliffissaaleqinerup akiorniarneranut 10 millionit koruunit aappaagu 2013-imi atorneqassasut, 2014-imi 20 millionit koruunit, 2015-imilu 30 millionit koruunit atorneqassasut, aappaagumut aningaasanut inatsisissatut siunnersuummi takuneqarsinnaavoq.

Nunaqarfimmiulli isorliunerusumiittullu sukumiinerusumik iliuuseqarfigineqartariaqartut, Aleqa Hammondip oqaatigaa:

- Ammaanersiorlugu oqalugiaatip oqallisigineqarnerani qitiutipparput innuttaasut peqataatillugit nunaqartut aqunneqartussaanerat eqqaasitsissutigalugu, Aleqa Hammond oqarpoq.

Kikkut naalakkersuisuni siuttuunersut apeqqutaatinnagu ajornartorsiutinik qaangiiniartoqartariaqartoq, Aqqaluaq B. Egedep oqaatigaa, isumaqatigiissusiornikkut tamanna anguneqarsinnaasoralugu:

- Naalakkersuisutigoortumik saqqummiunneqartut imatut ingerlanneqartariaqarput suleqatigiinnikkut anguniagassanngortillugit, taamaammat suut tamarmik ajorluinnarnerannik oqalunnani sutigut suleqatigiissinnaaneq suullu aaqqittariaqarnersut matumani eqqartorparput, Inuit Ataqatigiit politikkikkut oqaaseqartartuat Aqqaluaq B. Egede oqarpoq.

Aappaagumut aningaasanut inatsisissatut siunnersuut Inatsisartut ullumi ataatsimiinneranni ilaatigut oqaluuserineqartussaavoq.