IA sinnerlugu qinigassanngortittoq: KANUKOKA ingerlaannassava
KANUKOKA-mili siulittaasoq, Martha Abelsen isumaqarpoq, KANUKOKA-p nukittorsarneqarnerani aningaartuutikillisaasoqareersoq.
Politikerit ukiumut aningaasarsiarisartagaasa ikilisinneqarnissaat, Mille Søvndahl Pedersenip qineqqusaarutigaa. Tamatumunngalu assersuusiaraa, KANUKOKA-mi siulersuisut ajunngitsorsiarisartagaat.
Mille Søvndahl Pedersenip eqqarsaatiginerusaa tassaavoq, KANUKOKA-p siulittaasuata ukiumut aningaasarsiarisartagai 495.000 koruuniusut. KANUKOKA-milu siulittaasup ilaasortallu sulisarneri pillugit ima oqarluni.
- Aamma taama sulinartiginngilaq aamma taama ataatsimiigiakulanartiginani.
Mille Søvndahl Pedersen oqarpoq ilanngullugu tikkuarlugu KANUKOKA-p siulittaasuata ukiumut aningaasarsiami saniatigut aamma kommunalbestyrelsemut ilaasortaanersuiteqarmat ukiumut 135.000 koruuninik.
KANUKOKA-lli siulittaasuata, Martha Abelsenip oqaatigaa akissarsiarisartakkani sulinerminut naapertuuttut.
- Mille Søvndahl Pedersen isumaqatiginngilara oqarmat KANUKOKA aatsaat taama atorfissaqartiginnginneranik oqarnera. Kommunit sisamaannanngornerisa kingorna ataqatigiissaarinermik atsaat taama pitsaatigisumik inissisimanera pisariaqartinneqartigilersimavoq.
Matha Abelsen oqarpoq naqissuserlugulu oqatigalugu KANUKOKA-p siulittaasua aatsaat taama suliassaqalersimatigimmat, akissarsiarisartagai naapertuuttut.
Siulittaasulli akissarsiaat kisiisa Mille Søvndahlip eqqarsaatiginngilai aammali KANUKOKA-p siunissaa eqqarsaatigeeittariaqalersoq oqaatigalugu.
- Eqqarsaatigeqqilluartariaqarparput, ilumut KANUKOKA pisariaqarpa? Mille Søvndahl Pedersen aperivoq.
KANUKOKA-p 54,5 mio. kr.-inik nalilinnik pigisaqarpoq, taakkualu allanut atorluarneqarsinnaagaluartut Mille Søvndahl Pedersen oqarpoq.
- Kommunit tamarmik aningaasameerput. Kommunit ajornartorsiutinik ulikkaarput, meeqqat kaattut, utoqqaat utoqqalinersiutitik ikigivaat aamma suliniutit assigiinngitsut suliarineqartariaqarput. Suut tamaasa kommunini akissaqartinngilagut, taamaattumik eqqarsarluartariaqarpugut aningaasat qanoq atorluarneusinnaanerannik, Mille Søvndahl oqarpoq.
KANUKOKA-p siulittaasuata oqaatigaa kattuffiup pisariaqartinneqarnera ukiuni kingullerni annertusiartorsimasoq.
- KANUKOKA-p aatsaata taama inissisimanera pisariaqartinneqartigilersimavoq. Ungasinnerusoq eqqarsaatigalugu KANUKOKA atatsinniaannarlugu atatinneqarnavianngilaq. Qinigaaffiup uuma ingerlareernerani kommunillu sisamaannanngornerisa kingorna nalimmassaanerillu kingorbna alloriaqqinnerit tulliisa takutikkumaarpaat, suliassat qanoq ittut kommuninit suut pisariaqartinneqarnersut eqqartussallugit, KANUKOKA-p siulittaasua, Martha Abelsen taama oqarpoq.
