IA Qaasuitsup Kommuniani suleqatigineqarnianngilaq
Qaasuitsup Kommuniani kommunalbestyrelsemi partiit suleqatigiinnissamut isumaqatigiinniartut maanna tassaapput Siumut aamma Atassut. Siumut 13nik Kommunalbestyrelsemut ilaasortassanik qiningaatitaqarpoq, taamaasillunilu amerlanerussuteqarluarluni. Atassut pingasunik Kommunalbestyrelsemut isertitaqartoq maanna isumaqatigiinniarfigineqassaaq.
Allattoq Oline I. Olsen
apriilip 11-at 2013 12:07
-Oqaloqatigiinnigut ajunngivissumik ingerlapput, Ole Dorph, Qaasuitsup Kommuniani borgmesterinngortussaq oqarpoq. Piffissami kingullermi partiit Kommunalbestyrelsemut ilaasortanngortut isumaqatigiinniartartui qinigaasullu nutaat oqaloqatigiittarsimapput, Qaasuitsup Kommuniata ingerlariaqqinnissaanut suliniutissat oqaloqatigiissutigineqartarlutik. Taakkualu oqaloqatigiittarnerit tunuliaqutaralugit Siumut aamma Atassut Kommunalbestyrelsemi ukiuni sisamani tulliuttuni suleqatigiinnissamut isumaqatigiinniartussanngorput.
-isumaqatigiinniarnerit sapaatip akunnerata tullia ingerlasaqattaassapput, kisianni oqaatigisinnaanngilara qaqugu naammassissanersut, Ole Dorph oqarpoq.
